अगाधा भागाया
-शून्य माझ्यातले
घेता- भेटी आले
अनंतत्व

अनंत जोखण्या
- हाती मोजपट्टी
नव्हती- हिंपुटी
नाही झालो

धून अनंताची
झंकारली गात्री
अनंताचा यात्री
तेव्हा झालो

घोट घे रे यार काही होत नाही
जीव जातो फार काही होत नाही.

एकदा रक्ताळली बेधुंद झाली.
म्यान ही तलवार काही होत नाही.

बांधता घर एकदा कळले उन्हाला
सावली मग पार काही होत नाही.

भूत नसते सिध्द करण्या ठार मेला.
भूत त्याचे ठार काही होत नाही.

गंजलेल्या जिंदगीला धार देतो
आणि मी भंगार काही होत नाही.

पोरसवद्या बालिकेची माय होते.
स्वस्थ ती घार काही होत नाही.

एकदा तिज आपुलेसे मानले कि
वेदनेचा भार काही होत नाही.

+कानडाऊ योगेशु