आमची सुट्टी झ्याक.
राती अंगणात झोपायचं, सकाळी गार पाण्याची आंगोळ.
दिवसभर आंबे, खेळ.
अब्यास न्हाई. मार न्हाई.
घरात लई पावणे. आत्याची, मामाची पोरं.
त्यांच्यासंग शुद्ध बोलते.
अन्यादादान कागदाचे रंगीत तुकडे आणलेत.
मोजले म्या. सव्वीस लाल, सव्वीस काळे.
‘क्याट’ म्हनत्येत त्येला.
खेळतात ती समदी.
त्यादिशी बगत बस्ली.
सोनीदीदी अन्यादादाला “किलवर दश्शी” मागितली.
अन्यादादा बोल्ला, “नाटेठोम”.
मंग अन्यादादाने मागितलं तर राजादादाने येक पत्ता दिला त्याला.
मंग आमचा दादा राजादादाला “नाटेठोम” म्हन्ला.
म्या इचारलं “नाटेठोम? म्हंजे?”
दादा म्हन्ला, “घरात नाही”.
तितक्यात बायेर कुनीतरी आलं.
“अण्णा आहेत का पोरी?” काका इचारले.
“नाटेठोम” म्या सांगितलं.
आईने हाक मारली.
कैतरी काम असणार.
म्या म्हन्ली ” नाटेठोम”!
*शतशब्दकथा
प्रतिक्रिया
29 May 2014 - 10:07 am | जेपी
आवडली कथा.
29 May 2014 - 10:11 am | यशोधरा
मस्त! आन्जी नवा शब्द शिकली तर! लग्गेच वापरही करुन पाह्यला! कश्शी माझी गुणाची बाय! :)
29 May 2014 - 8:32 pm | सखी
कश्शी माझी गुणाची बाय! हेच म्हणते!
29 May 2014 - 10:17 am | प्रभाकर पेठकर
आन्जीची तर्‍हाच न्यारी. प्रतिसादाला 'नाटेठोम' म्हणताच येत नाही.
29 May 2014 - 12:06 pm | अत्रुप्त आत्मा
लगे रहोssss! नाटेठोम.
29 May 2014 - 12:36 pm | उदय के'सागर
गोड अन्जी :)
29 May 2014 - 1:12 pm | आत्मशून्य
:)
29 May 2014 - 1:13 pm | प्रचेतस
आन्जी रॉक्स
29 May 2014 - 7:42 pm | मुक्त विहारि
मस्त...
झक्कास...
29 May 2014 - 7:47 pm | Prajakta२१
त्या खेळाची आठवण झाली :-) :-):-)
29 May 2014 - 8:05 pm | बॅटमॅन
आञ्जी रॉकति रॉकते!!!
(सकलाञ्जीबाललीलाकेलिप्रियः) वाल्गुदमानवः|
29 May 2014 - 8:47 pm | सूड
मस्तच !!
29 May 2014 - 9:06 pm | ब़जरबट्टू
आवडले... आन्जी दगडसा...:)
29 May 2014 - 9:37 pm | इशा१२३
आन्जी मस्तच...
29 May 2014 - 9:40 pm | अजया
ब्येस !
29 May 2014 - 10:07 pm | शुचि
भारीये.
29 May 2014 - 10:11 pm | पैसा
नवा शब्द कसा वापरायचा आन्जीला लग्गेच कळलं!
29 May 2014 - 10:34 pm | भृशुंडी
हे एक नंबर!
कथेची रचनाही खूप आवडली
30 May 2014 - 4:35 am | रेवती
आन्जी गोड आहे. तिचे केस विस्कटलेले, दोन वेण्या असे काहीसे डोळ्यांसमोर येते. कथा आवडली.
2 Jun 2014 - 8:36 pm | एस
माझ्याही डोळ्यांसमोर असेच काही येतेय. पाहूया.
30 May 2014 - 8:24 am | चौकटराजा
काळाच्या ओघात घोळू, डिंग्री, या भाजा, भुतांखेतांच्या गोष्टी, कल्हईवाला, कंदिल, पिवडीचा रंग हे सगळे गायब व्हायला लागलेयत कसचे गायब झालेयत. जो पर्यंत चर्चगेट- विरार , छशिट- कर्जत लोकल आहेत तो पर्यंत पत्याना मरण नाही पण नाटेठोम ला भवितव्य नाही. या अजब खेळाची आठवण करून दिल्याबद्द्ल धन्स !
30 May 2014 - 11:39 am | मनीषा
आन्जी हुश्शार आहे !
नविन शिकलेला शब्द कधी आणि कसा वापरायचा हे तिला बरोबर कळतं.
30 May 2014 - 4:06 pm | योगी९००
आन्जी हुश्शार आहे ! नविन शिकलेला शब्द कधी आणि कसा वापरायचा हे तिला बरोबर कळतं.
यावेळी मात्र आन्जी निरागस वाटली नाही. थोडे वय वाढल्याने "निरागसपणा दाखवत स्वतःचे काम कसे करून घ्यावे" हे समजण्याची हुशारी आन्जीला आली आहे असे वाटले.
बाकी शशक आवडली.
31 May 2014 - 2:32 pm | आत्मशून्य
हळु हळु. (बनायला हवीच हे वैयक्तीक मत)
31 May 2014 - 3:19 am | प्यारे१
:) आडौली. :)
31 May 2014 - 2:25 pm | जयनीत
आन्जे करून घे नखरे जोवर पावने हायेत घरात तवर. एक डाव जाऊ दे त्याईले मंग आई अण्णा दावतील तुले नॉट्याठोम म्हंजे काय -हायते थे.
2 Jun 2014 - 6:39 pm | आतिवास
सर्व वाचकांचे आणि प्रतिसादकांचे आभार.
2 Jun 2014 - 9:33 pm | सुहास..
हा हा हा हा हा ..लईच !
3 Jun 2014 - 1:39 pm | किसन शिंदे
नवा शब्द कळाला आन्जीमूळे.
3 Jun 2014 - 1:50 pm | केदार-मिसळपाव
ते `नॉट अ‍ॅट होम´ असावे
6 Jun 2014 - 11:56 am | एसमाळी
मोजक्या शब्दातील कथा आवडली.
12 Jun 2014 - 10:35 am | मदनबाण
अशा गोष्टी वाचल्या ना... की दिवस यकदम ग्वाड होउन जातो बघा. :)
मदनबाण.....
आजची स्वाक्षरी :- अपर्णा तप करिते काननी :- {चित्रपट :-तांबडी माती}