आनंद - कार्लसन सामना - डाव १

दोन्ही खेळाडूंनी एकमेकांकडे बघितलेले नाही. एफ एफ ३ - कार्लसनने रेटी ओपनिंग ने सुरुवात केली
डी ५ - आनंद

असे लगेच दिसते आहे. खेळ्या बर्‍याच पटापट होताहेत.पहिल्या सहा खेळ्या झाल्या आहेत. दोघांचे उंट कर्णात आलेत.
सहाव्या खेळीला मॅग्नुस बी ३ खेळलाय.

वातावरणातला ताण अजूनही सैलावला नाहीये,कार्लसन उठून गेला होता परत आल्यावर त्याने उंट बी २ मधे सरकवलाय

आनंदची तयारी चांगली आहे तो सुद्धा फार वेळ घेत नाहीये. आनंदचा उंट एफ ५ मधे आला. डावाच्या मध्यातल्या चार चौकोनांवर ताबा मिळवण्याची धडपड सुरु आहे.
एक नक्की आहे की आधीच्या जगज्जेतेपदापेक्षा यावेळी भरपूर वेगवेगळी काँबिनेशन्स बघायला मिळतील.

नंतर काळ्याचा घोडा डी७ मधे आलाय. वजिराचा प्याद्याशी जोर तुटलाय. कार्लसनने डी ५ प्याद्यावर हल्ला चढवलाय.
आनंदने सी४ प्यादे घेतले.

कडेचे प्यादे घेणे हे थोडे इन्फीरिअर असते कारण डावाच्या मध्याचे नियंत्रण कमी होते. परंतु विशीची मोहोरी चांगली विकसित आहेत त्यामुळे हा धोका बहुदा विशीने घेतला असावा.

चांगले दिसते आहे

http://chennai2013.fide.com/anand-carsen-game-1-live-analysis-video/

बी ६ मधे हलवलाय. डावाच्या मध्यातलं नियंत्रण हा आता कळीचा मुद्दा आहे. कार्लसन कोणती खेळी करणार?
सी ५ खेळला तर घोडा डी५ मधे ताकदवान पोस्टवर येईल त्यामुळे ती शक्यता कमी आहे.
घोडा ई५ खेळेल का?

नंतर आनंदचा घोडा बी४ वरती येऊन पाढर्‍याच्या काळ्या उंटावर आलाय

दोघांच्या डोक्याचे एमाराय स्कॅन्स घ्यायला पाहिजेत!
मेंदू गरागरा फिरत असतील आतमधे!!

डावाची सुरुवात आणि मध्य यातली सीमारेषा धूसर झालेली समजते आहे. अचानक अकराव्या खेळीलाच डाव मध्यात आलाय. मॅग्नुस काय खेळणार उंट मागे घेणार का?

वजीर ए ५ का प्यादे ई ५?
वजिराची खेळी आक्रमक आहे. कारण त्यानंतर मॅग्नुसला वजीर सी२ वर किंवा बी३ वर घेऊन घोड्याला आधार द्यावा लागेल.

घोडा डी५. आता ई५ असे पांढर्‍याला उचकवले आहे.
किंवा मॅग्नुस घोड्यांची मारामारी करेल का? मग प्यादे डी ५ वर येऊन घोडा सी४ मधे मस्त बसेल!

घञाळे बर्‍यापैकी तोलून आहेत. मॅगुस ९ मिनिटे मागे आहे परंतु फारसे काळजीचे कारण नसावे.

अशा दोन प्रकारे घोड्याला सपोर्ट करता येईल. पैकी बी ३ मधे वजीर आला तर काळा घोडा ए ५ मधे जाऊन वजिरावर हल्ला करु शकतो. त्यामुळे बहुदा सी २ मधेच.

वजिराच्या बाजूला घुसमट झाली आहे. घोडा अडचणीच्या जागी आहे आणि वजिराशिवाय मदतीला कोणी नाही. घोड्यांची मारामारी केली तर डाव सोपा होत जातो. तो वजीर बी ३ खेळला!

घोडा ए ५ घेऊन. पांढरा वजीर ए ३ मधे.
दोनदा रिपीट झाली मूव. ड्रॉ कडे जाणार का??

सध्या तरी त्याची पोझीशन चांगली वाटते आहे (माझ्यामते जरा सरसच असावी).
अर्थात ड्रॉ झाला तरी चालेल कारण पुढल्या डावात त्याची पांढरी मोहोरी आहेत त्यामुळे तो एकप्रकारे आनंदसाठी मानसशास्त्रीय विजय असेल!

यांच्या खेळ्या रिपीट झाल्या! मॅच ड्रॉ!!

चांगले वाटते आहे. मारामारी डावात, बाकी कटिंग चहा मारायला तयार आहेत दोघे!! ;)

आनंदची सुरुवात काय असेल?
माझ्यामते ई ४.

जालावरती बर्‍याच ठिकाणी विश्लेषण आलेले आहे. हे चेस्.कॉम वरती आलेले विश्लेषण.
http://www.chess.com/news/its-on-carlsen-anand-game-1-4263

कालचा सामना, त्यानंतरची पत्रकार परिषद बघून आणि विश्लेषण बघून माझे मत पुढीलप्रमाणे -
कार्लसन अग्रेसिव खेळतो आणि मनाला येईल तशा ओपनिंगच्या चाली बदलत जातो हे पुन्हा एकदा अधोरेखित झाले. पहिल्या दोन खेळ्या बघून मी रेटी ओपनिंग समजलो परंतु ५ खेळींनंतर डाव फीयन्चेटो ग्रुन्फेल्ड डिफेन्सकडे सरकला. कर्णातले उंट हे त्या ओपनिंगचे वैशिष्ठ्य. त्यानंतर नवव्या खेळीला आनंदने सी४ चे प्यादे मारले. ही खेळीदेखील कार्लसनला लगेच अपेक्षित नसावी. कारण त्याने लगेच प्याद्याने आनंदने प्यादे मारले नाही तो थोडा विचारात पडलेला दिसला. त्याला अपेक्षित असणार्‍या लाईनपासून खेळ इथे बाजूला सरकायला सुरुवात झाली असावी. कार्लसनने प्यादे मारताच आनंदने घोडा बी६ वर आणला. मी माझ्या पहिल्या लेखात म्हटलं होतं की कार्लसनला प्यादी पुढे सरकवून त्यामागे मोहोरी सरकवून जागा ताब्यात घ्यायला आवडते. इथे आनंदने त्याच्या ह्या सवयीचा बरोबर फायदा उचलला असावा असा माझा कयास आहे. कारण कार्लसनने सी ५ असे प्यादे ढकलले आणि घोड्यावर चाल केली. लगोलग आनंदने सी४ अशी आक्रमक चाल केली, ही देखील अपेक्षित नव्हती कार्लसनला (कालच्या परिषदेत तो अनवधानाने म्हणा पण चटकन बोलून गेला की दहाव्या मूवनंतर "इमर्जन्सी ब्रेक्स" लावावे लागले!) (इथे कार्लसनने सी ४ वरचे प्यादे सरकवण्याच्या उत्साहाला थोडा आवर घालून हत्ती ई१ मधे खेळून ई४ असे प्यादे सरकवण्याची तयारी करायला हवी होती असे वाटते).
आनंदचा घोडा अचानक बी२ च्या उंटावर चाल करुन आल्याने उंटाला सी१ वर माघार घेण्याखेरीज पर्याय नव्हता. कारण त्या उंटाची मारामारी केली असती तर काळ्याच्या दोन उंटांसमोर डाव अवघड होत गेला असता.
पुढची घोडा डी ५ ही देखील लागोपाठ दुसरी आक्रमक चाल आनंद खेळला!इथे दोन धमक्या आहेत घोडा सी३ वरच्या बिनजोरी घोड्याला मारणार किंवा त्याहीपेक्षा धोकादायक म्हणजे बी ४ वरती तो उडी मारुन येऊ शकतो आणि पुढच्या खेळीला एफ५ मधला उंट सी२ असा येऊन वजिराच्या दाढीला हात घालतो!!
डी५ वरचा घोडा मारला तर काळा वजीर घोडा मारुन डावाच्या मध्यात येऊन बसतो. त्यापुढच्या खेळीला ई५ असं प्यादं खेळून डावाचा मध्य भाग ओपन करु शकतो. तिथून पांढर्‍याच्या अडचणी वाढू शकतात.
उंटाने सी२ घर धरल्याने आता वजीर फक्त बी३ मधूनच घोड्याला जोर लावू शकतो. वजीर तिथे आणल्या बरोबर आनंदने घोडा ए५ वर नेऊन वजिरावर हल्ला केला. आणि ए ३/बी३ अशा दोनच खेळी वजिराला ठेवल्या. इथे कोंडी फोडून डाव पुढे नेण्यात कार्लसनला काही स्वारस्य नव्हते कारण त्याला कोणतेही कंटिन्यूएशन मिळणे शक्य दिसत नव्हते.
बरोबरी करण्यात आनंदचा काहीच तोटा नव्हता, उलट तो कार्लसनला एकप्रकारे सज्जड दमच होता की काळ्या मोहोर्‍यांनी मी १६ खेळ्यात तुला बरोबरीत आणले आता उद्या माझी पांढरी मोहोरी आहेत!!

पत्रकार परिषदेत आनंदच्या डोळ्यांमधली चमक लक्षवेधी होती. त्याला पहिल्याच डावात सूर सापडल्याचा आत्मविश्वास दिसत होता. त्याऐवजी कार्लसन जरासा नाराजच दिसत होता, सरळ आहे, कारण पांढर्‍या मोहोर्‍यांनी खेळतांना लढत वगैरे सोडाच पण काही धुमश्चक्री निर्माण व्हायच्या आतच डाव बरोबरीत गेला होता, नामुष्कीची गोष्ट होती!

असो. कालचा डाव इतिहासजमा झाला. आज काय होते ते दुसर्‍या डावावरच्या दुसर्‍या धाग्यात अजून ३ तासांनी बघूयात.

तुमच्या प्रेमाने मला अखेर इथे आणलेच.
प्राडाँनी सुरुवात करुन दिलेली आहेच.
मी स्वतंत्र धागा सुरु करतो आहे तिथे पहिल्या सामन्याचे वर्णन करुयात.

(बुद्धीबळप्रेमी)चतुरंग