रम्य एक संध्या
कोमल गंधार,
कुसुंबी किनार
क्षितिजाला...
तेजस्वी रवीची
किरणे सोनेरी,
लाली गालावरी
संध्येच्या का !?!
मुग्ध प्रियतमा
संध्या ती आरक्त,
का 'रवी' आसक्त
'निशे'वरी !
दुखावली 'संध्या'
हळवा गंधार,
का क्षितिजापार
गेला सखा.....
हवेत गारवा
नभी चंद्र तारे,
मादक इशारे
निशेचेही...
आसुसला 'रवी'
निशेच्या छायेला,
कौमुदी कायेला
चंद्र साक्ष...
मिठीत 'रवी'च्या
'निशा'ही उन्मुक्त,
प्रकाश अव्यक्त
अंधारला...
मेघाचा मल्हार,
कित्येक प्रहर,
प्रणय कहर,
आसमंत.....
पहाट भैरवी
तिमिर छेदून,
गगन भेदून,
झंकारली.
उषेचे मांगल्य,
रक्तिम अवनी
श्यामल रजनी,
निस्तेजली...
देखण्या रवीचे,
चढू लागे तेज
परमोच्च ओज,
माध्यान्हीचे.
हळूहळू 'रवी'
झुके पश्चिमेला,
'संध्ये'ला भुलला,
सखा तिचा...
'रवी' अव्याहत,
तीच 'संध्या', 'निशा'...
हे कालपुरुषा...
तूचि धन्य!!!
-> रवि(वार) वर प्रेम करणारी
"मृगनयनी"
प्रतिक्रिया
22 Nov 2008 - 4:55 pm | जैनाचं कार्ट (not verified)
कालचक्र आवडली ~!
तु कविता मात्र छान करतेस हे नक्की :)
जैनाचं कार्ट
शुभ कर्मन ते कबहूं न डरो....!
आपले संकेतस्थळ
22 Nov 2008 - 7:13 pm | टारझन
ए नयने .. ही कविता मी वाचलेली ना पुर्वी ... :)
बेष्ट आहे गं ...
टाळ्या .... जबरान ...
- लाळझन
22 Nov 2008 - 5:15 pm | दत्ता काळे
फार सुरेख
प्रकाश अव्यक्त
अंधारला...
हे ++१
22 Nov 2008 - 5:45 pm | घाटावरचे भट
मस्त कविता...
23 Nov 2008 - 9:35 am | आनंदयात्री
सुंदर कविता आहे.
3 Dec 2008 - 10:22 am | सोनम
कविता सु॑दर आहे. कविता करणे आवडते का? तर मग अजून अशीच छान कविता करा.
10 Jul 2019 - 1:57 am | कृष्णलीला
मस्त. सुंदर कविता.
16 Jul 2019 - 3:56 pm | मदनबाण
मॄग्गा ची कविता बर्‍याच काळाने वाचायली मिळाली आहे...
मदनबाण.....
आजची स्वाक्षरी :- तेरी ज़िन्दगी को ज़िन्दगी बनाने आया पैसा, बेरंगी दुनिया को रंगीन बनाने आया पैसा, अँधेरे कमरों में बत्ती जलाने आया पैसा, सपने तेरा सच्चे करके दिखाने आया पैसा... :- Super 30
17 Jul 2019 - 1:46 pm | राघव
आवडली!
16 Jul 2019 - 5:28 pm | जालिम लोशन
सुंदर
17 Jul 2019 - 2:28 pm | श्वेता२४
.
17 Jul 2019 - 2:32 pm | प्रचेतस
अप्रतिम रचना