जिंदगी या बायकांची,राळ आहे का?

Primary tabs

सत्यजित...'s picture
सत्यजित... in जे न देखे रवी...
11 May 2017 - 12:10 am

वृत्तपत्रातून इतका जाळ आहे..का?
बातम्यांचा एवढा दुष्काळ आहे का?

शेत आहे काळजाचा एक तुकडा पण
कर्ज म्हणजे नांगराचा फाळ आहे का?

वास्तवाच्या विस्तवाशी खेळतो आहे
तो कुणी त्या अंजनीचा बाळ आहे का?

फुंकली जाते तरी गंधाळते रे ती...
जिंदगी या बायकांची,राळ आहे का?

आजही तो त्या विटेवर थांबला आहे
त्या विटेखाली जगाचा गाळ आहे का?

—सत्यजित

कवितागझलgajhalgazalमराठी गझल

प्रतिक्रिया

सत्यजित...'s picture

11 May 2017 - 12:14 am | सत्यजित...

गझलेबद्दल जाणून घेण्याची इच्छा असणारांसाठी...

गझलेचा प्रत्येक शेर,हा एक स्वतंत्र कविताच असतो! कोणताही शेर वेगळा करुन वाचला तरीही त्यातून पूर्ण अर्थ लागतो!
सर्व शेरांत साधारणतः एकच विषय हाताळला जातो,ती 'मुसलसल' गझल,तर प्रत्येक शेरांत वेगळ्या विषयावर भाष्य केले असेल,ती 'गैरमुसलसल' गझल!
त्यामुळे गझल वाचत/ऐकत असताना (विशेषतः गैरमुसलसल),रसिकाने पहिल्या शेरांतून स्वतःच्या मनाची सोडवणूक करुन पुढील शेराच्या विचारात नव्याने गुंतणे अपेक्षित असते!

शिवोऽहम्'s picture

11 May 2017 - 4:27 am | शिवोऽहम्

जिच्या सर्व शेरांत एकच विषय हाताळलेला असतो अशा गझलला 'नज्म' म्हणतात ना? की नज्म म्हणजेच मुसलसल गझल, किंवा इतर प्रकार?

शिवोऽहम्'s picture

11 May 2017 - 4:34 am | शिवोऽहम्

गोंधळ काहीसा दूर झाला हे वाचून (https://www.quora.com/Poetry-What-is-the-difference-among-Ghazal-Nazm-Sh...).

फैझ़च्या अनेक प्रसिद्ध कविता या नज्म़ आहेत हे रेख्तावर पाहिले (https://rekhta.org/poets/faiz-ahmad-faiz/nazms)

वेल्लाभट's picture

11 May 2017 - 11:33 am | वेल्लाभट

काय एक से एक पोतडीतून बाहेर काढताय राव !

शेत आहे काळजाचा एक तुकडा पण
कर्ज म्हणजे नांगराचा फाळ आहे का?

जबर.

सत्यजित...'s picture

12 May 2017 - 3:54 am | सत्यजित...

आपली दाद सतत लेखनास प्रोत्साहीत करते!खूप धन्यवाद अपूर्वजी!
मला स्वतःलाही हाच शेर अधिक भावला होता!

चिनार's picture

11 May 2017 - 11:47 am | चिनार

जबरा!!

प्राची अश्विनी's picture

11 May 2017 - 12:46 pm | प्राची अश्विनी

वा!

सत्यजित...'s picture

11 May 2017 - 8:20 pm | सत्यजित...

सर्वांचे मनःपूर्वक धन्यवाद!

आषाढ_दर्द_गाणे's picture

12 May 2017 - 4:13 am | आषाढ_दर्द_गाणे

कविता आवडली

पण ह्या ओळी अजिबात कळल्या नाहीत -

फुंकली जाते तरी गंधाळते रे ती...
जिंदगी या बायकांची,राळ आहे का?

सत्यजित...'s picture

25 May 2017 - 2:50 am | सत्यजित...

राळ एक सुगंधी द्रव्य आहे,जे जाळले असता सुगंध दरवळतो!