शतशब्दकथा स्पर्धा २०१७: अडनड

आये , सरकारनी हजार पाचशेच्या नोटा बंद केल्यात.नाय बदलल्यातं त्याला किंमत ऱ्हाणार नाय", किसना म्हातारीला म्हणाला.
"माह्याकं काह्याचा पैका." म्हातारी फणकारली.
"हां ! माजघरात ठिवलेत गठुड्यात. पण अडनडीला म्हून रुपया द्याची वासना झाली नाही" सून आतून कडाडली.
"तू माह्या पैशावंच टपून बस. औशादपाण्याला कवा धीला मोकळ्या मनानी पैका? " म्हातारी तणतणत परसदारी निघून गेली.
पायरीवर तिचा नातू डोक्याला हात लावून बसला होता.
"कारे दत्तूबाळा?" म्हातारीने विचारले.
"आज्जे पुण्याला पोलिसभरती हाये. गाडीभाडं आन एक दिवस रहायला हजार रुपय लागतील. बापूकं नायहेत येव्ह्ढे पैशे." दत्तू म्हणाला.
"अरं द्यावा !!", म्हातारी कणवेनी म्हणाली, " माह्याकं तुह्या आत्त्यानी दिलीली हजारची नोट हाये. जा घिऊन!”