लव फळ

जसे राम फळ, सीता फळ तसे हे लव फळ. हे मोठे झाड होते. ह्याची पाने रुंद मोठी असतात. लव फळ कच्चे असताना हिरवेगार साधारण पोपटी असे असते. मग पिकत गेल की पिवळसर रंग चढतो. आणि पिकले की एकदम गर्द नारंगी कलर (पिकलेल्या पपई सारखा) येतो. ह्याचे साल चरट अगदी पातळ असते. ह्यात गरा पेक्षा बियाच जास्त असतात त्या पांढर्‍या असतात. चविला हे फळ आंबट गोड असते. ह्याच्या बियांमुळे हे फळ खायच म्हणजे टाइमपास असतो. बराच वेळ बिया तोंडातच काढत खात बसायला लागते. कारण ह्याचा गर सिताफळाप्रमाणेच बीला चिकटलेला असतो. पण अगदी चिवटपणे.

हे झाड माझ्या माहेरी अगदी आमच्या माळ्याच्या जिन्याच्या समोर आहे. शाळेत असताना मी सकाळी, संध्याकाळी जिन्यावर अभ्यास करत असे. त्यावेळी ह्या झाडावर वेगवेगळ्या प्रकारचे पक्षी ही फळे खाण्यासाठी येत. त्यात पोपट, चिमण्या, सुगरण, कोकीळा, कावळे, पोपटी रंगाचे पण चिमण्यांएवढे पक्षीही येत. ते दृष्य अगदी बघतच रहावेसे वाटे. झाडाला भरपुर फळे यायची. आम्ही काढून ती पक्षांनापण उरायची. कारण हे फळ जास्त परिचित नसल्याने इतर लोकांकडून ह्या फळासाठी डिमांड येत नसे. पण ज्यांना ह्याची चव कळ्ली आणि ज्यांना आंबट गोड वर्गातील फळे आवडता आणि जे हे फळ खाण्यासाठी वेळ देउ शकतात ते मात्र घेउन जायचे. माझ्याही लव फळ हे आवडीचे फळ आहे. मी ह्या फळाचा पाव भाग १५ मिनीटेतरी साधारण खात बसायचे. पण मला ह्याची चव खुप आवडायची. आता ह्या झाडाला पुर्वी सारखी फळे धरत नाहित. पण मागच्या आठवड्यात माहेरी गेले तेंव्हा अचानक नजर गेली लागलेल्या फळावर आणि तुमच्याबरोबर हे झाड, फळ शेअर कराव म्हणुन खालील फोटो तुम्हाला दाखवायला काढले.

हे हिरवे कच्चे फळ

हे पिकत आलेले फळ पण पुर्ण पिकलेले नाही. पिकल्यावर एकदम ऑरेंज कलर होतो.