50 दिवसांसाठी 50 गमती आणि प्रयोग!

नमस्कार! मुलांना सुट्ट्या लागल्या आहेत. त्यांचा वेळ कसा जाणार ही‌ पालकांची चिंता आहे. मुलांसाठी 50 गमती व प्रयोग मी आणत आहे. दररोज मी माझ्या ब्लॉगवर एक प्रयोग व एक गमतीची कृती पोस्ट करेन. ह्या प्रयोगांसाठी घरामध्ये असलेल्या गोष्टीच लागतील! हे सर्व प्रयोग व गमती करायला अगदी सोप्या आहेत. वय 8 पासून पुढची व मोठेही त्याचा आनंद घेऊ शकतात. हा पहिला प्रयोग.

प्रयोग 1. पाणी कसं पडत नाही?

हा आश्चर्यकारक प्रयोग मला माझ्या मुलीने- अद्विकाने करून दाखवला! एक ग्लास पाण्याने पूर्ण भरा. एक ग्लासच्या आकारापेक्षा मोठा पुठ्ठा घ्या. ग्लासपेक्षा थोडा मोठा आकार कापून घ्या. ग्लासमध्ये पाणी पूर्ण् भरा. ग्लासवर पुठ्ठा ठेवा. आता ग्लास सिंकच्या वर धरा. ग्लास व पुठ्ठा दोन्ही व्यवस्थित पकडा. आता ग्लास उलटा करा! पुठ्ठ्याच्या खाली ठेवलेला हात काढून घ्या. हात काढला तरी पुठ्ठा पडत नाही आणि पाणीही पडत नाही! खालून काहीच आधार नसूनही पुठ्ठा पडत नाही! हे होण्याचं कारण म्हणजे पाण्याचं वजन हे खालून वरच्या दिशेने असलेल्या वातावरणाच्या दाबापेक्षा कमी असतं! ग्लास पूर्ण भरलेला मात्र हवा. 2-3 वेळेस हे करून पाहा व आनंद घ्या!

गंमत कृती 1. कागदापासून फटाका बनवा!

हीसुद्धा गंमत अद्विकाने मला दाखवली. कागदापासून तुम्ही मोठा दचकवणारा आवाज करणारा फटाका बनवला आहे का? त्याला एक मिनिटही लागत नाही. एक कागद घ्या, त्याला दोनदा दुमडा. मग त्यावर एक ट्रिक करायची! थोडा प्रयत्न करून पाहा व तुमच्या दोस्तांना विचारा. खूप सोपं आहे. मित्रांना दचकवायला किंवा घाबरवायला नक्की वापरता येईल!

तुमचा अनुभव नक्की शेअर करा. मी दररोज माझ्या ब्लॉगवर असा एक प्रयोग व एक गंमत पोस्ट करेन. ब्लॉगची लिंक ही आहे. पोस्टस इंग्रजीमध्येही उपलब्ध असतील. इथेही अधून मधून अपडेटस देईन.

(वाचल्याबद्दल धन्यवाद. लेख जवळच्यांसोबत अवश्य शेअर करावा. -निरंजन वेलणकर 09422108376. आकाश दर्शन, ध्यान, फन- लर्न व फिटनेस सत्र. लेख लिहीण्याचा दिनांक: 1 मे 2025)