चित्रपट: The Descendants!

हॉटस्टार वर काहीतरी शोधत असताना ह्या चित्रपटाबद्दल कळलं. शक्यतो मी गुगल करून अंदाज घेतल्याशिवाय चित्रपट बघत नाही. त्यात 'जॉर्ज क्लूनी(की क्लोनी)' आहे म्हटल्यावर बघायचं ठरवलं. त्याचे थोडेच चित्रपट बघितलेत पण त्याचा अभिनय, संवादफेक प्रचंड आवडलीय.

तस चित्रपटात नाट्य खूप नाही आहे आणि बऱ्यापैकी संथ वाटू शकतो. पण त्याच वेळी एकदम तरल आणि मनाला स्पर्शून जाणारा वाटला.

हवाई बेटांवर राहणार कुटुंब. नायकाच्या ३-४ पिढ्या आधी हवाई बेटांपैकी एका मुख्य भूभागाचे बऱ्यापैकी अधिकार नायकाच्या(मॅट) पूर्वजांकडे असतात. राजघराणे म्हणा ना. त्यायोगे आताच्या विस्तारलेल्या भल्या मोठ्या कुटुंबाकडे प्रचंड मोठी जमीन असते. अर्थातच नैसर्गिकदृष्ट्या समृद्ध. त्याच्या ट्रस्टचे प्रमुखपद मॅटकडे असते. त्याच बर चाललेलं असत आणि ह्या जमिनीवर काही चरितार्थ अवलंबून नसतो. पण जवळपास बाकी सगळे नातेवाईक ती जमीन रिसॉर्ट वगैरे साठी विकून येणाऱ्या कोट्यवधी डॉलरकडे डोळे लावून बसलेले असतात. त्यासाठीचा व्यवहार सुरु करण्याबाबत चर्चा चालू असते. ती जमीन तस म्हटलं तर एक वारसा आहे आणि सगळ्या बेटावरच्या लोकांसाठी तो एक जिव्हाळ्याचा विषय आहे.

याच दरम्यान मॅटच्या बायकोचा अपघात होतो आणि ती कोमामध्ये जाते. १० आणि १७ वर्षाच्या मुली. ज्या बापाशी खूप जवळ नाहीत. थोरली बोर्डिंग स्कूल मध्ये आहे आणि बऱ्यापैकी वाया गेल्यात जमा आहे. दुसरी पण शाळेत इतर मुलींवर दादागिरी करणे वगैरे प्रकार करत असतेच.
बायको कोम्यातून बाहेर येणार नाही म्हटल्यावर मोठ्या मुलीला घरी आणायला गेल्यानंतर बायकोसंबंधी एक धक्कादायक गोष्ट मुलीकडून कळते. आणि तिथून एक वेगळीच घालमेल आणि एक वेगळा प्रवास सुरु होतो.
या प्रवासादरम्यान मॅट आपल्या मुलींच्या जवळ कसा येतो, त्यांना कसा सांभाळतो(की मुली त्याला सांभाळतात!) हे खूपच छान मांडलं आहे. सुखांत नाही आहे माहित आहेच पण तरी सुद्धा त्या प्रवासात त्यांचं नातं खूप छान दाखवलं आहे. मुलींची भाषा, वागणं बघून तो एका क्षणी एवढा हतबल होतो की मुलीच्या वाया गेलेल्या मित्राकडे (जो ह्या दरम्यान ह्यांच्या सोबतच राहत असतो) सल्ला मागतो की तू माझ्या जागी असतास तर काय केलं असतंस!

एका प्रसंगात मोठी मुलगी आणि तिचा मित्र यांच्या एकमेकांच्या स्पर्शाने बेचैन झालेला बाप त्यांना म्हणतो की 'माझ्या समोर तरी जरा स्पर्श टाळा'! त्या दोघांच्या वयाप्रमाणे ते वागताहेत, पण कुठेही त्यांना सीमा ओलांडलेली दाखवली नाही. उलट ते दोघे समोर असलेल्या परिस्थितीला आहे तस सामोरं जाताना दिसताहेत. काही झाकून ठेवण्याचा किंवा उगीच आव आणायचा प्रयत्न नाही करत.
असे खूप छान प्रसंग आहेत. स्पॉईलर नको म्हणून जास्त लिहीत नाही आता!

शेवट सुद्धा सुंदर केलाय. तिच्या अस्थींचे समुद्रात विसर्जन करतानाचा आणि शेवटचा एकत्र टीव्ही बघतानाचा प्रसंग म्हणजे परमोच्च बिंदू आहेत!
बाकी हवाई बेटांचं नितांतसुंदर चित्रण आणि निळाशार समुद्र तर आहेच!
जरूर बघा!