लाजवंती

स्वप्नदेशातून आले साथ देण्या सूर हे
ऐकुनी माझे तराणे लाजणे तव चूर हे

पाहिले मी…तू दिला होता इशारा मंदसा
स्पर्श माझा धीट होता का धपापे ऊर हे?

रे निसर्गा ! काल कोठे रंग होते हे तुझे?
लाजली माझी प्रिया ते घेतले तू नूर हे

आठवूनी लाजणे ते तीव्र होती भावना
कामनांचे अश्व धावे अंतरी चौखूर हे

काय सांगू काय केले हाल त्यांनी आमचे
पाहिले लाजून प्रणयीं अन सुखाचे पूर हे

मैत्रिणींचे गूज आहे गोकुळाने ऐकले
लाजता राधा कळे की श्याम नाही दूर हे
-----------------------------------------------
संपादनः
'पाहिले लाजून....' ही ओळ नंदनच्या सूचनेप्रमाणे बदलली आहे.
-----------------------------------------------