तेथे कर माझे जुळती !

मूळचे केरळचे रहिवासी असलेले रेनिल्सन आणि निशा आपल्या तीन वर्षे वयाच्या मुलीबरोबर घरी परत जात होते.प्रवासात त्यांच्या गाडीला अपघात झाला त्यात निशा जागीच ठार झाल्या. रेनिल्सन यांना अनेक फ्रॅक्चर्स झाली. छोट्या तमन्नाला जबर दुखापत झाली. डॉक्टरांनी तमन्नाला ब्रेन डेड घोषित केले. ही घटना 20 जानेवारीची.

पत्नी अपघातात गेलेली, स्वत: मणिपाल येथील हॉस्पिटल मधे जखमी अवस्थेत अशा परिस्थितीत देखील रेनिल्सन यांनी अपूर्व मनोधैर्य दाखवत स्वत:चे दु:ख बाजूला ठेवून तमन्नाचे अवयव दान करण्याचा निर्णय घेतला. आणि तिचे हृदय, यकृत,आणि मूत्रपिंड दान करण्यासाठीच्या कागदपत्रांवर सह्या केल्या.

ह्यामुळे तीन जणांना जीवनदान मिळाले आहे. अहमदाबाद येथील 21 महिन्याच्या एका बालकाला तमन्नाचे हृदय बसवण्यात आले आहे. अडीच वर्षाच्या एका मुलीला तमन्नाचे यकृत तर साठ वर्षे वयाच्या एकाला मूत्रपिंड बसवण्यात आले आहे.

सकाळटाइम्स मध्ये ही बातमी वाचल्यानंतर असं नक्कीच मनात येऊन गेलं की देव करो आणि असा प्रसंग आपल्यावर न येवो. पण आलाच तर असं अतुलनीय धैर्य आणि दात्रुत्व मला दाखवता आले असते ?

उत्तर नाही असंच आलं असतं बहुधा.

तमन्ना आणि तिचे वडील रेनिल्सन यांना माझे लाख प्रणाम.