Skip to main content

एक शृंगारीक कविता

लेखक रामदास यांनी सोमवार, 15/09/2008 19:05 या दिवशी प्रकाशित केले.
भिरभिरते अशी नजर कशाला का, पदर चाचपून बघते ग. भाळावरचे थेंब टिपूनी का ,उगाच खुद्कन हसते ग. एकांतामधी चावेचिमटे कोण तपासून बघते ग दाताखाली ओठ चावूनी कोण उसासून थकते ग. झिम्म्ड फुगडी मिठी रांगडी कुठे सांडली बुगडी ग दहीवर आले उंबरठ्याशी रात्र तोकडी पडली ग बोटावरती दिवस मोजूनी हिशोब कसला धरते ग लुटून गेले पीक पहाटे गोफण आता कसली ग.
Taxonomy upgrade extras
अनुभव
लेखनविषय:
वाचने 25719
प्रतिक्रिया 44

प्रतिक्रिया

विद्याधर३१ सोमवार, 15/09/2008 19:11
बोटावरती दिवस मोजूनी हिशोब कसला धरते ग लुटून गेले पीक पहाटे गोफण आता कसली ग. वा फक्कड कविता.... आवडली...... सुरेख... विद्याधर

विनायक प्रभू सोमवार, 15/09/2008 19:29
http://vipravani.wordpress.com/ दहीवर म्हण्जे काय. खुप गोंधळ होतो आहे. पीक लुटायला पहाटेपर्यंत वाट बघावी लागली. फोर्मुला सांगा. सहजरावाच्या फेव्रिट धिरुभाई पेक्षा अमिर होईन. गोफण कसली मध्ये कसली प्रश्नार्थक आहे का दुसरे काही. दुसरे काही असले तर त्याचा पण फोर्मुला सांगा. जगातल्या ३०% पूरुशांचे प्रोब्लेम सुट्तील. बर आहे बाबा पहाटे पीक लुटुन गोफण कसलेली. आय्ला कशाला काका लो़कांचे त्रास वाढव्ताय. आपला चेला विनायक प्रभु

यसवायजी सोमवार, 03/11/2014 23:08
फोर्मुला हवाय का? तर मग व्यनि करा! आँ?? जापानचं त्याल इकणारं ते तुमीच काय ? :)) (फोर्मुल्याची गरज नसलेला) - SYG

रामदास सोमवार, 15/09/2008 19:47
१ दहीवर म्हणजे सकाळी पडणारं धुकं +दव. २ पीक बर्‍याच वेळा लुटलं गेलं. ३ गोफण म्हणजे साधी गोफण. अंकल ,काय विचार आहे? http://ramadasa.wordpress.com/ हा माझा ब्लॉग आहे.

विनायक प्रभू सोमवार, 15/09/2008 21:56
http://vipravani.wordpress.com/ कळत नकळत तुम्ही एक मास्टर पीस लिहिला आहे. बहुदा कळतच. मराठी भाषेच्या लवचिकतेचा आधार घेत. इंग्रजी मध्ये अनुवाद ह्याच प्रतीचा झाला तर मास्टर जॉन्सनचे प्रकाशक डॉलर मध्ये पैसे देतील. कॉपी राईट घ्या. रुटीन ला कंटाळ्लेल्या किंवा रुटीन च्या बाहेर चे जग माहित नसलेल्याना ही कविता संजिवनी आहे. विश्वास ठेवा मला लोणी लावायला अजिबात जमत नाही. विनायक प्रभु

धनंजय सोमवार, 15/09/2008 22:21
लडिवाळ प्रसंग नाजुकपणे डोळ्यासमोर उभा राहिला. शेवटच्या दोन ओळी पुन्हापुन्हा वाचाव्या लागल्या. या ठिकाणी माझ्या डोक्यात पेरणीचे चित्र इतके घट्ट बसले आहे, (विशेषतः दिवस मोजायच्या संदर्भात) की पीक लुटले, गोफणीने रक्षण करायला उशीर झाला हे उपमाचित्र काही केले तरी चपखल बसत नाही. तरी वेदकाळापासून रखडत आलेल्या तप्तमुद्रांकित "पेरणी"पेक्षा कापणीची तुमची उपमा तजेलदार, आह्लाददायक, गोड-वात्रट आहे. त्यामुळे कविता पुन्हापुन्हा वाचून पूर्ण अर्थ लावायचा प्रयत्न करतो आहे.

प्रा.डॉ.दिलीप बिरुटे सोमवार, 15/09/2008 23:14
शृंगारातल्या नाजुकपणाचा तोल शब्दात मस्त बांधलाय वाचायला मजा आली. एकांतामधी चावेचिमटे कोण तपासून बघते ग दाताखाली ओठ चावूनी कोण उसासून थकते ग. क्या बात है ! उघड्या रानात चाव्याचिमट्यांच्या आठवणींनी उसासा नाही टाकायचं तर काय ! अप्रतिम चित्र उभ केलंय, जब्रा रे ! झिम्म्ड फुगडी मिठी रांगडी कुठे सांडली बुगडी ग दहीवर आले उंबरठ्याशी रात्र तोकडी पडली ग बोटावरती दिवस मोजूनी हिशोब कसला धरते ग लुटून गेले पीक पहाटे गोफण आता कसली ग. गोफनीची गरज पीक लुटून नये म्हणुन,तो केवळ धाक. पण आता बुगडी सांडली आहे, याच्यातच पीक नेल्याची खूण दिसते. तेव्हा बोटावर आता कोणता हिशोब करायचा ! असो, बर्‍याच दिवसानंतर एक चांगली कविता वाचायला मिळाली.

बेसनलाडू सोमवार, 15/09/2008 22:23
कविता फार फार आवडली. (शृंगारप्रेमी)बेसनलाडू

अजय जोशी सोमवार, 15/09/2008 22:50
अनुभवास प्राधान्य आहे. छान. (आपला पुणेरी) अ. अ. जोशी

ऋषिकेश सोमवार, 15/09/2008 22:51
;) मस्त! एकदम मस्त! -(लब्बाड!) ऋषिकेश

शैलेन्द्र सोमवार, 15/09/2008 22:57
सुरेख, अस फक्त अनुभवि लोकच लिहु शकतात का हो काका?

फटू मंगळवार, 16/09/2008 07:01
मिपावर इंजिनियरींगला असणारी, नुकतीच इंजिनियरींग कॉलेज सोडलेली पोरंही आहेत बरं का... बाकी, बोटावरती दिवस मोजूनी हिशोब कसला धरते ग लुटून गेले पीक पहाटे गोफण आता कसली ग हे अगदी क्लास !!! (शृंगाराचं पुस्तकी ज्ञान असलेला :P ) सतीश गावडे आम्ही इथेही उजेड पाडतो -> मी शोधतो किनारा...

विसोबा खेचर मंगळवार, 16/09/2008 17:11
रामदासराव, साधी, सोपी परंतु तेवढीच सुंदर कविता आवडली....! :) आपला, (दहिवरप्रेमी) तात्या.

अप्पासाहेब बुधवार, 17/09/2008 21:08
लुटून गेले पीक पहाटे ह्या ऐवजी लुटून नेले पीक पहाटे असा बदल करावा, जर 'गेले' हाच शब्द हवा असेल तर - लुटले गेले पीक पहाटे असा बदल करता येईल.. पटलं तर व्हय म्हना आप्पा लै मिसळ खाल्ली कि मुळव्याध होते

रामदास गुरुवार, 18/09/2008 11:32
वाचून बघा. त्यात थोडी त्रुटी आहे.जो अपेक्षीत तो इंपॅक्ट आला नाही असं वाटतंय. http://ramadasa.wordpress.com/ हा माझा ब्लॉग आहे.

सर्वसाक्षी बुधवार, 17/09/2008 23:18
रामदासशेठ आपण कवी सुद्धा आहात हा शोध आज लागला

विसोबा खेचर गुरुवार, 18/09/2008 00:12
आपण कवी सुद्धा आहात हा शोध आज लागला सहमत आहे...! स्वगत : आयला, हा रामदाससुद्धा अंमळ पोचलेला वाटतो! :) तात्या.

मदनबाण गुरुवार, 18/09/2008 10:20
शेअर बाजारातुन डायरेक्ट कविता ? :) मदनबाण..... "Hinduism Is Not a Religion,It Is a Way Of Life." -- Swami Vivekananda

सुनील गुरुवार, 18/09/2008 10:33
लुटून गेले पीक पहाटे गोफण आता कसली ग. क्या बात है!!!! Doing what you like is freedom. Liking what you do is happiness.

लिखाळ मंगळवार, 23/09/2008 19:36
रामदास, कविता जबरदस्त. लयबद्ध. फार आवडली. आपण महान आहात ! --लिखाळ.

संदीप चित्रे मंगळवार, 23/09/2008 19:56
बोटावरती दिवस मोजूनी हिशोब कसला धरते ग लुटून गेले पीक पहाटे गोफण आता कसली ग. व्वा ! इथल्या इथे नमस्कार घ्या रामदास. बर्‍याच दिवसांनी महानोरांसारखी सकस कविता महानोरांशिवाय कुणाकडून तरी आली :) लिखते जियो !

अविनाशकुलकर्णी रविवार, 10/03/2013 16:29
बोटावरती दिवस मोजूनी हिशोब कसला धरते ग लुटून गेले पीक पहाटे गोफण आता कसली ग लाडिक अन सुचक

आतिवास सोमवार, 11/03/2013 11:13
अतिशय सुंदर, चित्रदर्शी, अर्थपूर्ण कवितेला इतकं 'गद्य' शीर्षक का दिलं असेल हा प्रश्न पडला आहे!

जेपी रविवार, 20/10/2013 20:40
लया भारी कवीता , या मीपाच्या खजीन्यात काय काय दडलय मिपाच जाणे .

स्वप्नज सोमवार, 03/11/2014 07:51
मिपाच्या खजिन्यातले एक अप्रतीम रत्न...

बोका-ए-आझम सोमवार, 03/11/2014 11:39
सुंदर. लताबाईंनी गायलेलं एक अप्रतिम गीत - बाळगू कशाला व्यर्थ कुणाची भीती ग - याची आठवण झाली. ही कविता म्हणजे त्याचा समर्पक उत्तरार्ध वाटतो.

सतिश गावडे सोमवार, 03/11/2014 12:32
शुक्रवारी कवीशी प्रत्यक्ष भेटीत मनसोक्त गप्पा झाल्या त्यामुळे असं वाटतंय की रामदास काका कविता वाचत आहेत आणि आपण ऐकतोय.

बॅटमॅन मंगळवार, 04/11/2014 00:31
त्याने काय फरक पडणार? की प्रेमकाव्य असल्यास फोर्मुला वेगळा अन प्रणयकाव्य असल्यास वेगळा असं काही आहे?

चिनार मंगळवार, 04/11/2014 11:36
सुंदर कविता . नेमक्या ओळींमध्ये संपूर्ण प्रणयराधना वर्णिली आहे !!

psajid मंगळवार, 04/11/2014 14:49
प्रा.डॉ.दिलीप बिरुटे यांच्या सारखीच माझी प्रतिक्रिया आहे ! त्यांच्या प्रतिक्रियेतील एकही शब्द न पुसता मी इतकेच म्हणेन कि, कविता वाचताना चलतचित्र पाहतोय असा भास होत राहिला. खूप खूप आवडली शृंगार कविता ! क्या बात है! बर्‍याच दिवसानंतर एक चांगली कविता वाचायला मिळाली.