मुक्तक..सास्वा विरुद्ध सुना

सास्वा विरुद्ध सुना वाद आहे जुना
तरीही रंगतो अजुनी जसा पानासवे चुना
अल्लड अवखळ नव्हाळी होऊन येते सून
घरातील हिरवाई मात्र झाली असते जून
थिरकत भिरभिरते सून, तिकडे सासूचा डोळा
मनी शंका का ती येई , 'लेक माझा भोळा' ?
सूनही बोले ऐशी की जैसी सावध हरिणी
वरून साखर पेरणी अन मनी वेगळीच करणी
युक्त्या प्रयुक्त्या, पेच डावपेच सरळ न हा लढा
शस्त्रे अस्त्रे अन वार प्रहारांनी सुटेल का हो तिढा ?
मूक वाद अन प्रकट संवाद कळे न आल्यागेल्याला
ज्या गावच्या बोरी त्याच गावच्या बाभळी हे माहित असे घराला
आज सरशी सासूची तर उद्या असते सुनेची
होता होता एक दिवस सासू होते सुनेची
सुरु होतो नवीन जमाना...
पुन्हा सास्वा विरुद्ध सुना...!