चांगली बातमी

विविध प्रकारच्या वाईट बातमीचा धुराळा उडत असताना नेहमी प्रमाणे आमच्या मीडियाने एक चांगली बातमी लोकां पर्यंत पोचवलीच नाही.

महिंद्रा ह्या भारतीय कंपनीच्या Airvan १० ह्या दहा लोकांना नेऊ शकणाऱ्या विमानाला DGCA आणि इतर वायुवाहन संबधी यंत्रणांनी हिरवा कंदील दाखवला. आता महिंद्रा येत्या सहा महिन्यात भारतात हि विमाने विकू शकेल. अमेरिका आणि ऑस्ट्रेलिया मध्ये २०१७ सालीच त्यांना परमिशन मिळाली होती.

इंजिन रोल्स रॉयस चे आहे. अजून पर्यंत विमानासाठी इंजिन बनवणे भारताला शक्य झालेले नाही. विमानाची किंमत सुमारे १० कोटी असेल. पण त्याच्या तुलनेत सेसना इत्यादी विदेशी विमानांची किंमत सुमारे १८ कोटी आहे. हे विमान चांगले चालले तर भारतातील अनेक छोट्या शहरांना विमानसेवेने जोडणे शक्य होणार आहे. विमान छोटे असल्याने कमी उंचीवरून उडू शकते आणि ईशान्य भारत, काश्मीर किंवा घनदाट जंगल असलेल्या भागात ते छोट्या धावपट्टीवर सुद्धा उतरू शकते.

विमान भारतीय बनावटीचे नाही. Gipps-Aero हि ऑस्ट्रेलियन कंपनी महिंद्राने विकत घेतली होती आणि हे विमान सुद्धा मेलबॉर्न इथेच बनवले जाईल. सुमारे २०० विमाने ह्या कंपनीने आधी विकली होती. विमान निर्माण हे फार उच्च दर्जाचे अभियांत्रिकी ज्ञान आहे आणि विदेशी गुंतवणूक भारतात होत नसल्याने मागील ६० वर्षांत भारताला ह्या क्षेत्रं काहीही विशेष साध्य करणे शक्य झाले नाही. त्या मानाने १९४७ साली भारतात खाजगी विमान निर्माण करणाऱ्या कंपन्या होत्या हे ऐकून लोकांना आश्चर्य वाटते.

अमेरिकेत आणि ऑस्ट्रेलिया मध्ये परमिशन असली तरी भारतीय DGCA नियमा नुसार १५०० किलो पेक्षा जास्त वजनाच्या विमानाला किमान २ पायलट असणे आवश्यक आहे त्यामुळे महिन्द्राला मूळ डिसाईन मध्ये खूप बदल करावे लागले.

महिंद्राने ह्या क्षेत्रांत पाऊल ठेवल्याने भारताला ह्या क्षेत्रांत देशांत सुद्धा प्रगती करणे शक्य होईल अशी अपेक्षा आम्ही ठेवू शकतो.