कलाकार

कलाकार

मला कोण म्हणून विचारतात ते,
मी एक कलाकार आहे..
तुमच्यातलाच एक चेहरा,
तुमच्यातलाच एक विचार आहे;

सर्व बंध तोडून मी,
झेप घेतो आकाशात..
उरुन राहतो कोठेतरी,
तुमच्या ओझरत्या स्पर्शात;

मी स्वर आहे भैरवीचा,
कधी मल्हाराची तान..
कधी भिजरी पायवाट,
कधी रखरखणारे रान;

मी स्पर्श आहे,
मी भाव आहे..
मी तुमच्याच ओळ्खीचे,
अनोळखी नाव आहे;

मी एक रंग आहे,
कधी तुम्हीच रंगविलेला..
रंगमंचाच्या शुभ्रपटावर,
मुक्त उधळलेला;

होउनी सात रंग,
स्वतःला सांधतो मी..
कधी होउनी इंद्रधनुष्य,
सात रंगात वाहतो मी;

-पंचम