मी

मी
मुक्त तरीही बन्धनात मी
फुलाफुलाच्या स्पन्दनात मी
मंद ज्योत ती मीच तेवती,
विरघळणा-या चन्दनात मी

कधी मीरेची एकतारी मी
कधी राधेच्या मन्थनात मी
वससी माझ्या अंतरात तू,
अविरत तुझिया चिंतनात मी

कळी पाकळी फुलवित जाते
जणु भ्रमराच्या गुन्जनात मी
पारिजातकापरी शिंपिले
सौख्य तुझ्या रे अंगणात मी

तुझ्या प्रीतीचा चन्द्र जडविला
नक्षत्रांच्या कोंदणात मी
भाग्यदैवता, तुलाच जपले
भाळावरच्या गोंदणात मी!

महिला दिनाच्या हार्दिक शुभेच्छा!