हळव्यांची गळवे

मनावर यांच्या ठसठसणारी गळवे आहेत.
यांना काही म्हणू नका; हे हळवे आहेत.

गैरसमज करुन घ्यायला हे नेहमी पुढे आहेत.
यांना काही म्हणू नका; हे हळवे आहेत.

हे इतरांना टोचतील; प्रत्युत्तरे त्यांना नको आहेत.
यांना काही म्हणू नका; हे हळवे आहेत.

हे नेहमीच बरोबर असतात; इतर लोकच चुकत आहेत.
यांना काही म्हणू नका; हे हळवे आहेत.

भावनांना डिवचलेत? आता ते सूडाच्या तयारीत आहेत.
यांना काही म्हणू नका; हे हळवे आहेत.

शब्दबाण मारलेत? ते ग्रुप सोडायच्या तयारीत आहेत.
यांना काही म्हणू नका; हे हळवे आहेत.

यांना हवं तसं जगात घडत नाही.त्यामुळे अस्वस्थ आहेत.
यांना काही म्हणू नका; हे हळवे आहेत.

त्रास फक्त यांनीच भोगला जगात.बाकीचे सुखात आहेत.
यांना काही म्हणू नका; हे हळवे आहेत.

संयमाच्या नावे शिमगा आणि चिडचिडीचे टोक आहेत.
यांना काही म्हणू नका; हे हळवे आहेत.

लावून थोडीशी संध्याकाळी; बडबडायला बसलेच आहेत.
यांना काही म्हणू नका; हे हळवे आहेत.

कसं वागावं यांच्याशी? बघावं तेव्हा पेटलेले आहेत.
यांना काही म्हणू नका; हे हळवे आहेत.

'माहिमचे हळवे' या आगामी काव्यसंग्रहातून.