सांजवेळी सोबतीला..

सांजवेळी सोबतीला - एकदा येऊन जा
ओठ जे गातात गाणे - ओठी तू घेऊन जा

ज्या - मुळे फुलती कळ्या - अन् पाकळ्या होती खुळ्या
वसंत तो "मी" प्रितीचा - तू भेटुनी बहरून जा

न भेटण्याची कारणे आता मला देऊ नको
भेटण्याच्या कारणांची - कारणे ऐकून जा

याच - साठी टाळतो मी - पौर्णीमेचा चंद्र ही
कोजागिरी असते कशी ?- तू एकदा दाऊन जा

शब्द ही सोडून जाती - लागता चाहुल तुझी
मी जे मुक्याने बोलतो - तू एकदा समजून जा

श्वास ही बघ एक होती - "मी "- न् - "मी"! --"तू" -न्- "तू" !
देह मी ठेवीन तेव्हा "अमर" - तू होऊन जा

आज आयुष्या मला - थोडी "तिची" सोबत हवी
धन्य मग वाटेल मरणे - तू एकदा जगवून जा

काटा फुलाशी राहतो तैसा असे रुसवा तिचा
समजूत मी काढेन ग ! - तू भांडणे ऊकरून जा

कोण जाणे ? कोणत्या काळात मग भेटू पुन्हा ?
हुंदके देईन "मी" - "तू" पापण्या भिजवून जा

मयुरेश साने...दि..०४-जानेवारी-११