अस्वस्थ बरसात

अस्वस्थ बरसात
अशीच अवचित आली
सर ती पावसाची,
सोबत दाटून आली
सय तुझ्या आठवणींची

तो पाऊस बेफाम
तो वारा मदहोश,
ती चिंब बरसात
असलेली तुझी साथ

ते गारठलेले हात
ते उष्ण श्वास,
होणारे ते स्पर्श
हवेहवेसे सारे क्षण

आली होतीत मिठीत
जेव्हा कडाडली होती वीज,
होते मानले किती आभार
मी तिचे मनातल्या मनात

त्या न संपणार्‍या गप्पा तुझ्या
ते न विरणारे हास्य तुझे,
आता छळते ही बरसात सदा
जेव्हा आठवतात ते क्षण पुन्हा

भिजतोय आजही मी तसाच
साजणे चिंब तुझ्या आठवणीत,
बरसणार्‍या या जलधारात
वाहणारे ते स्वप्न इंद्रधनुषी पाहत

- रवि बदलापूरेकर