नकार

नकार

तू,

तू मला जन्म दे
तुझ्या शिवाय कोण झेलेल हा प्रसव कल्लोळ?
अन
तुझ्याशिवाय कोण करेल हा अट्टाहास?
म्हणूनच तू मला जन्म दे
अग त्या मूळेच तर तू महान ठरतेस

पण

कृपा करून

तू माझ्या पोटी नको येऊ.

तू

तू माझी भगिनी हो
माझ्या दिवाळ्या, रक्षाबन्धन हीं सारी
तुझ्या शिवाय कशी सजतील?
नाही तू माझी भगिनी हो
तुझ्याशिवाय पहाटेची ती सुगंधी तेल माझ्या अंगाला कशी लागतील?
अन रक्षाबन्धनाचा रंगीत धागा कपाळावरच्या नामासह
मी कसा मिरवेन?
नाही तुला झालच पाहिजे माझी भगिनी

पण

कृपा करून

तू माझ्या पोटी नको येऊ.

तू

तू माझी साथीदारीण हो
अग , निसर्गाचा नियमच आहे हा
माझ्या पालवी फुटलेल्या मनाला विहारायला
तुझी तनुलताच तर हवी मला
तुझ्या शरीराच्या गंधान वेडावतो मी
माझा आत्मा समाजाची सारी बन्धन झुगारून
तुझ्याशी एकरूप होऊ पाहतोय
दे
दे मला , तुझी साथ दे
या अडखळणाऱ्या श्वासांना एक लय दे
हो, स्वाधीन हो माझ्या
अन शांतव माझ्या तनामनाची आग

पण

कृपा करून

तू माझ्या पोटी नको येऊ

तू

तू देव्हारी रहा
तुझ रणरागिणी रूप माझ संकट हरू दे
तुझ लक्ष्मिच पाउल माझ घरदार उजळू दे
तुझ्या वीणेच्या झन्कारे माझा ज्ञानदीप तेवू दे
तुझ्या प्रसन्न रूपाने माझ मस्तक लवू दे

पण तू देव्हारीच रहा

कृपा करून

माझ्या पोटी नको येऊ

काय? काय म्हणतेस?
आधुनिक समाजाचा वारस मी?
हो मी आधुनिक समाजाचा वारसच तुला ठणकावून सांगतोय
कृपा करून माझ्या पोटी नको येऊ

नाहीतर

पूर्वापार 'दुधपिलाई' सोडून
मी हीं आधुनिक शस्त्रे वापरीन
पण तुला नष्ट करेन.

म्हणून,

म्हणूनच सांगतोय

कृपा करून

माझ्या पोटी नको येऊ.

__/\__
अपर्णा