चौकट

मळलेल्या वाटेवरुन मी जातो
बागेतल्या त्या कोपर्‍याकडे
गुलमोहोराखाली असलेल्या
लाकडी बाकाकडे
तिथे असतो गुलमोहोराच्या फुलांचा
पखरण ल्यायलेला जमीनतुकडा.

मला हे चित्र सुखदायी वाटतं
वाटतं करावंसं चौकटबध्द
मी चौकट टाकतो त्या चित्राभोवती.

आता लाकडी बाक, मागे बहरलेला गुलमोहोर
अन् त्याखालची लालरेशमी जमीन
... तरीही आजूबाजूस राहतेच उरलेली
अनाच्छादीत जमीन अन् लांब गेलेली फिकट वाट.

मग मी चौकट लहान करतो
लाल जमीनीच्या तुकड्यासाठी
ओबडधोबड जमीन आणि
वाट काढूनच टाकतो चित्रातून.

आता राहते फक्त लाल फुलांचीच जमीन
लाकडी बाक आणि मागचा गुलमोहोर.

मग मी प्रवेश करतो चौकटीत,
अन् जाऊन बसतो चित्रातल्या त्या लाकडी बाकावर . .
रम्य आठवणी काढायला
वाटेवर भेटलेल्या माणसांच्या . . .