सामंत

'गांधी येडा होता रे'
सामंत नेहमी म्हणतो
आणि मग
फोडला पायजे...XXत दम...ईस्रायल...
असं कायकाय बोलत राहतो
दोन पेग चढवलेले असतील तर सामंत अध्यात्म, सेक्स, मायन संस्कृती, काश्मीर प्रश्न यावर पण बोलतो
'नेहरू एक्झॅक्टली कुठे चुकला' हे सांगतो मग तो.

सामंतला ब-याच गोष्टींबद्दल माहिती असते
....वरवरची
आणि माहिती नसलेल्या गोष्टींबाबत सामंत
'अमेरीकेचा गेम आहे सगळा' असं म्हणतो
अमेरीका नक्की काय करते ते त्यालाही माहिती नसतं
पण त्याने त्याला काही फरक पडत नसतो
खरंतर,
कुणालाच काही फरक पडत नसतो
कारण 'अमेरीका गेम करते' म्हणल्यावर सगळे माना डोलावतात.

सामंत बोलतो...
माहिती असो वा नसो
...सामंत बोलतो
आणि
बेधडक आपली मतं ठोकून मोकळा होतो
सामंत नेहमी घाईत असतो
त्यामुळे त्याला विचार वगैरे करायला वेळ मिळत नसावा
सिग्नलला पण तो हिरवा दिवा लागायची वाट बघत नाही
शेवटचे दहा सेकंद बाकी असतानाच गाडी दामटतो
पोलिसांनी पकडलं तर शंभराची नोट देऊन सुटतो
आणि मग पोलिस कसे पैसे खातात हे ऎकवतो
पण सामंतला एकूणच सिस्टीमच्या विरोधात वागायला बोलायला आवडतं
आणि लोकांनाही आवडत असावं...
सिस्टीमच्या विरोधात कोणी बोललेलं

सामंत सगळीकडे असतो
आॅफिस मधे, लग्नकार्यात, सोसायटीच्या मिटींगमधे, हाॅटेलात आजूबाजूला सगळीकडे
कधी कधी तर
मला सामंत माझ्यात असल्याचा पण भास होतो
कारण मी ऎकलंय मला बोलताना...'गांधी येडा होता रे'