संसाराची सप्तपदी मी -

संसाराची सप्तपदी मी
धरून हाता तुझ्या चालले ;
वाट बिकट - ना मजला कळले
मुक्कामी मी कशी पोचले !

भाजलेल्या मी पोळीचा
नकाशा कधी गोल नसे,
कौतुकाची छान कशी रे
त्याला दाद तुझीच असे !

उत्साहाने केलेली मी
भाजी शिजलेलीच नसे-
चेहऱ्यावरी भाव तरी तव
आनंदी का खास दिसे !

अर्धाकच्चा पाणीदार तो
खडेयुक्त जरि भात असे -
मुखातुनी पण तुझ्या कशी
ती ' वा वा ' ची तान वसे !

तुझ्या पावलावरी ठेवुनी
पाऊल मी चालत आहे -
अर्धांगी मी पूर्ण तरी
गमक साथ रे तुझीच आहे !