नशीबाला दोष देता देता
नशीबाचा कौल घेता घेता,
नशीबात तू पण असणारेस.....
माहीत नव्हतं !
खडतर पायवाट तुडवत जाता
काट्यांना त्यावर चुरडत फिरता,
फुलासारखं तू जपणारेस.....
माहीत नव्हतं !
अस्ताव्यस्त आयुष्य विखरता
कणा-कणाने झुरता-झुरता,
आपसुक, अलगद सावरणारेस.....
माहीत नव्हतं !
आत खोल काहीसं तुटता
मरत-मरत जगता-जगता,
श्वास होऊन तारणारेस.......
माहीत नव्हतं !!!
प्रतिक्रिया
17 Sep 2010 - 12:45 pm | पाषाणभेद
माहीत नव्हतं या ऐवजी सोबत हे शिर्षक अधीक योग्य होतं असं वाटतं. अर्थात मुलगी तुमची. बारसं तुम्हीच करा!
17 Sep 2010 - 11:58 pm | अथांग
कवितेत व्यक्त झालेय, ते त्या क्षणी जाणवलेले आहे. त्यापुढे त्याची सोबत आहे की नाही याची कल्पना नसल्याने ते नाव कसे वाटेल माहीत नाही. "वाचवणारा/जाणीव देणारा" नेहमीच "सहप्रवासी/सोबती" असतोच असे नाही. अर्थात मी आधीच सांगितल्याप्रमाणे मला खरंच कवितेला नाव द्यायला सुचत नाही. त्यामूळे आपल्या सूचनेबद्दल आभारी आहे.
18 Sep 2010 - 12:56 am | शिल्पा ब
मला कविता वगैरे काही समजत नाही..पण हि कविता आवडली..
18 Sep 2010 - 2:42 am | शुचि
सकारात्मक छान कविता