साहित्य: एक वाटी अख्खी उडीद डाळ (साल नसलेली), अडीच वाट्या जाड रवा, मीठ, एक टेबलस्पून तेल, पाणी
कृती : उडीद डाळ किमान पाच तास पाण्यात भिजवा. नंतर डाळ वाटून घ्या व पाणी घालून पातळ करा.
एका कढईत रवा भाजून घ्या पण रंग बदलू देवू नका. रवा कोमट झाल्यावर वाटलेल्या डाळीच्या मिश्रणात घाला.
कालवून घ्या व पाण्याचं प्रमाण गरज वाटल्यास याचवेळेस वाढवा. मिश्रण पातळ असले पाहीजे कारण रवा नंतर पाणी शोषून घेतो.
चवीनुसार मीठ व एक टेबलस्पून तेल घाला. नीट मिसळून उबदार जागी ठेवून द्या.
साधारण आठ ते दहा तासात पीठ फुगून येते. मिश्रण अजिबात ढवळायचे नाही.
इडलीपात्राला तेलाचा हात लावून घ्या व चमच्याने वरवरचे पीठ घेऊन पात्रात घाला.
इडल्या वाफवून काढाव्यात व चटणी, सांबाराबरोबर सर्व्ह कराव्यात.
वरील साहित्यात लहान आकाराच्या ३० इडल्या होतात.
ही पाककृती माझ्याकडच्या पुस्तकातील आहे. थोडे बदल केले आहेत.
वाटल्यास आपण वरील पिठात थोडे मटार, बारीक चिरलेले गाजर, कोथिंबीर व मिरीपूड घालू शकता.
हे जिन्नस पीठ वाटल्यावर मिसळावे लागतात.
रेवती
प्रतिक्रिया
3 Jan 2009 - 11:34 pm | विसोबा खेचर
क्या केहेने भाभीजी..!
अत्यंत मनमोह्क फोटो..
वा र लो..!
तात्या.
3 Jan 2009 - 11:37 pm | बिपिन कार्यकर्ते
हम्म्म्म..... जुलूम आहे हो जुलूम.
बिपिन कार्यकर्ते
3 Jan 2009 - 11:39 pm | आपला अभिजित
उद्या रविवार आहे. जमवायचे का?
3 Jan 2009 - 11:41 pm | चित्रा
आम्हीही येतो! :)
छान पाकृ. इडली मी रवा घालून सहसा करीत नाही, पण आता करीन तेव्हा अशीच करून पाहीन.
3 Jan 2009 - 11:56 pm | रेवती
जरूर या. आमच्या घरी येण्यासाठी आमंत्रणाची गरज नाही. फक्त फोन करून सांगा.
उद्या या खरच. चित्राताई व विकासही येतायत. मजा येइल.
रेवती
3 Jan 2009 - 11:41 pm | श्रावण मोडक
चटणीचा रंगच आमंत्रण देणारा आहे. आणि इडलीचा स्पॉंजीनेसच ती किती हलकी झाली असणार हे दाखवतोय. जुलूम हेच खरं.
4 Jan 2009 - 12:10 am | पक्या
छान पाकृ. फोटो पण जबरदस्त. धन्यवाद.
फोटीतील चटणी ची पण पाकॄ मि़ळेल का?
4 Jan 2009 - 12:40 am | रेवती
वरील चटणीसाठी साहित्य मोजून घेतले नव्हते म्हणून अंदाजे देत आहे.
साधारण एक मोठी वाटी ओले खोबरे, अर्ध्या वाटीला थोडे कमी डाळं (फुटाण्याचं, सालं काढलेलं), हिरव्या मिरच्या, छोटा आल्याचा तुकडा, लसणीची एक मोठी पाकळी, मीठ, थोडी साखर हवी असल्यास, पाव चमचा चिंच कोळ, फोडणीचे साहित्य. लाल मिरची सुकी, कढीपत्ता, उडीद डाळ.
खोबरं ते चिंचेचा कोळ मिक्सरवर बारीक वाटावे. पळीफोडणी हळद न घालता करावी व त्यात उडीद डाळ, सुकी मिरची, व कढीपत्ता घालावा. ही फोडणी चटणीवर ओतावी व एकत्र करावे.
रेवती
5 Jan 2009 - 12:17 am | पक्या
चटणीच्या पाकॄ साठी धन्यवाद, रेवतीजी.
4 Jan 2009 - 12:12 am | शितल
अरे वा,
रेवती,
फोटो आणि कृती खुप छान आहे.:)
पुढच्या वेळी अशा प्रकारे इडली करून पाहिन.
चटणीची ही पाककृती दे ना.
:)
4 Jan 2009 - 12:43 am | कोलबेर
फोटू जबरी आला आहे. पटकन एक इडली उचलुन घ्यावी असे वाटते.
4 Jan 2009 - 12:59 am | लिखाळ
अरे वा.. छान पाकृ आणि फारच मस्त फोटो.
इडल्या खरोखरच उचलून घ्याव्याश्या वाटत आहेत. :)
-- लिखाळ.
माझ्या अनुदिनीला येथे भेट द्या.
4 Jan 2009 - 3:25 am | शाल्मली
अरे वा.. छान पाकृ आणि फारच मस्त फोटो.
इडल्या खरोखरच उचलून घ्याव्याश्या वाटत आहेत
अगदी असंच म्हणते..
रेवती ताईनी मला पाहुणचाराला बोलावलेच आहे.. आता जायला पाहिजे लवकरच.. :)
--शाल्मली.
4 Jan 2009 - 1:04 am | आपला अभिजित
एक होती इडली
ती खूप चिडली
तरातरा धावली
सांबारात जाऊन पडली
सांबार होते गरम
इडली झाली नरम
चमचा आला खुशीत
बसला बशीच्या कुशीत
(इथे माझी मुलगी `कुशीच्या बशीत' म्हणायची!)
चमच्याने पाहिले इकडेतिकडे
इडलीचे केले तुकडेतुकडे
मुलांनी केली इडली फस्त
इडली झाली होती मस्त!
4 Jan 2009 - 1:05 am | पांथस्थ
इडली आणि कविता दोन्हि झकास.
- पांथस्थ
माझी अनुदिनी: रानातला प्रकाश...
माझी छायाचित्रे - फ्लिकर
4 Jan 2009 - 1:07 am | लिखाळ
हा हा .. बडबडगीत मस्त.
माझी पुतणी नेहमी हे गाणं फोन वर म्हणून दाखवते :)
-- लिखाळ.
माझ्या अनुदिनीला येथे भेट द्या.
4 Jan 2009 - 6:16 am | रेवती
बडबडगीत आवडले.
धन्यवाद!
रेवती
4 Jan 2009 - 4:04 am | मीनल
अख्खी उडीद डाळ कशासाठी?
काही कारण?
मीनल.
4 Jan 2009 - 6:14 am | रेवती
अख्ख्या उडीदडाळीच्या वापराने इडली ज्यास्त स्पाँजी होते असे दाक्षिणात्य मैत्रिणीने सांगितले होते (कारण माहीत नाही).
तसा अनुभव आला म्हणून मीही आता अख्खी डाळ फक्त इडलीसाठी वापरते.
रेवती
4 Jan 2009 - 5:17 am | प्राजु
फोटो तर एकदम खासच..
लगे रहो..!
- (सर्वव्यापी)प्राजु
http://praaju.blogspot.com/
4 Jan 2009 - 7:49 am | वर्षा
बडबडगीत मस्त आहे.
इडल्या एकदम टॉप!!!!!
4 Jan 2009 - 8:43 am | सुनील
फोटोवरूनच इडल्यांचा हलकेपणा जाणवतोय! तसा नेहेमी तांदूळच वापरला आहे, आता रवा वापरून पहायला हवा.
Doing what you like is freedom. Liking what you do is happiness.
4 Jan 2009 - 2:12 pm | विकि
रवा इडली ची कृती आणि फोटो दोन्ही आवडले.
रवा इडलीत आंबटपणा नसल्याने मला रवा इडली अत्यंत प्रिय आहे. मला एक शंका आहे इडलीचा रवा(इडलीसाठी वापरतात तो) आणी जाडा रवा दोन्ही एकच आहे का की दुकानात इडलीचा रवा म्हणून वेगळा रवा मिळतो.
4 Jan 2009 - 6:49 pm | रेवती
रवा हा साधा रवा आपण शिरा करताना वापरतो तो आहे.
हा रवा गव्हाचा असतो.
रेवती
4 Jan 2009 - 2:30 pm | सहज
रवा इडली आता करुन पाहीली पाहीजे.
4 Jan 2009 - 3:34 pm | प्रा.डॉ.दिलीप बिरुटे
लैच भारी फोटो आला इडलीचा !!!
रव्याची इडली सांगावी लागेल बनवायला !
5 Jan 2009 - 9:17 am | अभिरत भिरभि-या
रवा इडलीचा (मला माहित पडलेला) इतिहास ..
महायुद्धाच्या काळात तांदुळ मिळणे मुश्किल झाल्याने इडली-प्रेमी मंडळींनी रवा डोसा व रवा इडली हे प्रकार तयार केले.
इडली शिवाय जगतील ते मद्रासी कसले ? :)
5 Jan 2009 - 11:57 am | ३_१४ विक्षिप्त अदिती
पाकृ, इडली आणि बडबडगीतही ... कालच एम.टी.आर.च्या मिश्रणाची रवा इडली करताना, हे घरी कसं बनवायचं याचा विचार करत होते.
धन्यवाद रेवतीताई.
अदिती
आमच्यात दारू पिण्यासाठी नवीन वर्षाची, नवीन कपडे खरेदी करण्यासाठी दिवाळीची, मोदकांसाठी चतुर्थीची, आणि शुभेच्छा देण्यासाठी वाढदिवसाची वाट बघत नाहीत.
5 Jan 2009 - 2:25 pm | मनस्वी
इडली के व ळ सुं द र!
इडली आणि चटणीच्या पाकृसाठी धन्यु रेवती!
8 Jan 2009 - 3:50 am | रेवती
सर्व वाचकांचे मनापासून आभार.
आपल्या प्रतिसादांमुळे उत्साह वाढला आहे.
पुढची पाककृती लवकर टाकण्याचा प्रयत्न करीन.
रेवती
18 Jan 2014 - 10:19 am | रमेश आठवले
रवा डोसा च्या पा. कृ. ची वाट पहात आहे.
इडली आणि चटणीचे फोटो फारच सुरेख
30 Mar 2009 - 5:05 pm | hemuu
करुन पहिन
30 Mar 2009 - 7:38 pm | स्वाती दिनेश
आत्ता पाहिली ग रेवती रवाइडली, सहीच दिसतेय. उचलून तोंडात टाकावी अशी..
कित्त्येक महिन्यात केली नाही ग रवा इडली.. आता लवकरच करेन..:)
स्वाती
30 Mar 2009 - 8:17 pm | रेवती
धन्यवाद हेमू व स्वातीताई!
आज मिपा उघडल्यावर एकदम इडली समोर आली आणि मी दचकले;)
(बरेच दिवस झाले पाक्रु देऊन म्हणून).
रेवती
16 Jan 2014 - 10:32 am | मॄदुला देसाई
एकदम हिट्ट पाकृ आहे रेवतीताई :) धन्यवाद!
16 Jan 2014 - 2:28 pm | अत्रुप्त आत्मा
16 Jan 2014 - 3:13 pm | मदनबाण
आज्जेची इडली मला बरं कशी दिसली नाही ! ;)
आवडली हो... ;)
16 Jan 2014 - 5:36 pm | सूड
मस्त जाळीदार झालीय.
16 Jan 2014 - 5:44 pm | बॅटमॅन
हे पाहून यमटीआरवाल्यांची एक हिट्ट झायरात आठवली.
https://www.youtube.com/watch?v=OkEvwRgphEk
16 Jan 2014 - 5:45 pm | मारकुटे
हा धागा कसा काय वर आला?
16 Jan 2014 - 5:51 pm | कवितानागेश
जाळीदार इडल्यांमुळे.
16 Jan 2014 - 6:10 pm | मारकुटे
सांबर असतं तर इडली बुडून राहिली असती आणि वर आली नसती
16 Jan 2014 - 6:14 pm | बॅटमॅन
हा शब्द वाचून हरणाच्या समसंज्ञ चुलतभावाची आठवण झाली अन त्या डाळद्रावणात सांबराचे लेग पीस टाकलेले आहेत असे दृश्य डोळ्यांसमोर उभे राहून भडभडून आले.
16 Jan 2014 - 6:17 pm | मारकुटे
तुम्हाला झालेल्या त्रासाबद्दल दिलगीर आहे.
16 Jan 2014 - 6:20 pm | बॅटमॅन
दिलगिरीबद्दल धन्यवाद.
अन खरा उच्चार आहे "सांबार". उत्तरभारतीयांचा सांबर उच्चार लै डोक्शात जातो.
16 Jan 2014 - 6:24 pm | मारकुटे
उच्चार काहीही असला तरी पदार्थाची चव बदलत नाही.
बोली भाषेत अनेक उच्चार होतात. वेगवेगळे उच्चार केले जातात. गंगा गँगस होते. सिंधू इंडस होते. मुंबई बॉम्बे होते. संवाद महत्वाचा असतो. मुळचा उच्चार जो आपण मानतो तोच खरा असं कशावरुन? शेवटी तो संकेत आहे. आणि तोच असला पाहिजे असा अट्टाहास चुकीचा ठरतो. काळाच्या ओघात प्रमाण उच्चार बदलत जातो.
समोरचा माणूस उच्चार वेगळा करतो म्हणून डोक्यात राख घालून कसं चालेल? कदाचित काळाच्या ओघात तोच उच्चार प्रमाण होईल. काय सांगावे? कालाय तस्मै नमः
16 Jan 2014 - 6:30 pm | बॅटमॅन
शिवी दिली तरी माणूस बदलत नाही असे अर्ग्युमेंट देऊ का यावर =))
मुद्दा हुकला आहे. भारताबाहेरच्यांनी केलेल्या उच्चारांशी कर्तव्य नाहीये मला.
अर्थातच. पण तो शब्द ज्या भाषेतला आहे तेथील रूढ संकेत मी सांगितला तर चुकले का?
सकाळी डोक्याला तेल लावतो ते सोडून आजवर अन्य काही घातल्याचे आठवत नाही. कालौघात काय होईल ते होवो. सध्या काय आहे ते मी सांगितले. सांबर हा उत्तरभारतीय संकेत आहे आणि मराठीत एका प्राण्याचे नावही तेच आहे सबब मूळ शब्द सुचवला इतकेच.
16 Jan 2014 - 6:33 pm | मारकुटे
>> पण तो शब्द ज्या भाषेतला आहे तेथील रूढ संकेत मी सांगितला तर चुकले का?
पण मी त्या भाषेत बोलतच नव्हतो. माझ्या भाषेत मी मला हवा तो शब्द वापरला. चुकले का?
16 Jan 2014 - 6:38 pm | बॅटमॅन
मराठीत मी बहुतांना सांबार असाच उच्चार करताना पाहिले आहे तस्मात माझ्यासाठी संकेत तोच आहे.
16 Jan 2014 - 6:39 pm | मारकुटे
५० झाले ब्वा !
16 Jan 2014 - 6:41 pm | बॅटमॅन
बहुत धन्यवाद!
(५१)
16 Jan 2014 - 8:54 pm | सूड
>>मुंबई बॉम्बे होते.
आता तर हद्दच झाली. हे शिंचे पुणेकर मुंबईला बॉम्बे म्हणतात. मुंबई ही मुंबईच आहे. मुं ब ई. समजलं. चला दहा वेळा लिहून काढा.
16 Jan 2014 - 6:26 pm | रेवती
अरे काय चावटपणा सुरु आहे! ;) जुने धागे वर आणून चेष्टा करता का गरीबाची!
16 Jan 2014 - 6:40 pm | रेवती
कारण नसताना पाकृच्या धाग्यावरील शाब्दिक कसरती थांबवाव्यात असे सांगू इच्छिते.
16 Jan 2014 - 6:51 pm | प्यारे१
कुणी संपादक कसं हजर नाही ब्वा इथं?
श्या! =))
17 Jan 2014 - 10:08 am | मारकुटे
सहमत आहे.
पण अशा शाब्दिक कसरती हेच मिपाचे बलस्थान असल्याचे ऐकले होते. असो.
16 Jan 2014 - 6:46 pm | कवितानागेश
एक सांबाराची पाकृ टाकून त्यात या वरच्यांना बुडवून टाक गं.. :)
16 Jan 2014 - 6:49 pm | बॅटमॅन
पाकृ ऑर नो पाकृ, सांबारात बुडायला आपण कधीपण तयार हाओत.
(सांबारप्रेमी) बट्टमण्ण.
16 Jan 2014 - 10:58 pm | कवितानागेश
अरे, त्या जाळीदार इडल्या बुडवायला सांगतेय सांबारात.
आला लग्गेच्च! :)
17 Jan 2014 - 2:08 am | प्यारे१
इडल्या, बुडल्या!
बाकी 'सांभार' म्हणे संभाजी महाराजांवरुन पडलेलं नाव आहे.
(कधीतरी नजिकच्या भूतकाळात मिपावरच वाचलेल्या लेखातली माहिती असावी)
16 Jan 2014 - 8:29 pm | शिद
मस्त झालीय इडली...करुन पहायला हवे आता.
एक शंका: अतिशय थंड वातावरणात पिठ कसे आंबवावे? मागच्या विकांताचा बेत फसला :(
16 Jan 2014 - 10:47 pm | राघवेंद्र
भट्टी (गॅस ओव्हन) थोडा वेळ ( ५ मिनेटे ) गरम करुन, नंतर पिठ रात्रभर ठेवावे.
17 Jan 2014 - 2:32 pm | bela
पिठ ठेवलेल्या भान्ड्याभोवति जुना स्वेटर गुन्डाळा. उबेमुळे छान पिठ येइल.
16 Jan 2014 - 11:00 pm | रेवती
राघवसाहेब म्हणतायत तसं अव्हन अगदी २ मिंटे गरम करून , नंतर बंद करून त्यात पीठ झाकून ठेवले जाते पण माझ्या अव्हनमधील लाईट ढणढण्या असल्याने मी लाईट चालून करून ठेवल्यास सहा तासात पीठ्न फुगते. हा प्रयोग करायचा नसल्यास कांद्याचा शेंडा, बुडखा कापावा, साले काढावीत व पिठात बुडवून ठेवावा. पीठ फर्मेंट झाल्यानंतर काढून घ्यायला विसरू नये. छोटा कांदा नसल्यास (जो आमच्या इथे मला कधी मिळत नै), मोठ्या कांद्याचा तुकडाही चालेल.
17 Jan 2014 - 1:54 am | प्रभाकर पेठकर
>>>>कांद्याचा शेंडा, बुडखा कापावा, साले काढावीत व पिठात बुडवून ठेवावा.
अरे व्वा! हा प्रयोग करून पाहिला पाहिजे.
17 Jan 2014 - 12:10 pm | शिद
:)
16 Jan 2014 - 11:12 pm | शुचि
फोटोत ईडली-चटणी खतरनाक चविष्ट दिसतेय !!!
17 Jan 2014 - 2:06 pm | आयुर्हित
पाकृ आवडली, फोटोत एवढी चांगली दिसते, तर खायला हि खूप छान असणार!
ही इडली पाहून मला एक छान विषय मिळाला.धन्यवाद रेवती ताई.
बडबड गीत ही आवडले! Keep it up!
आपला मिपास्नेही: आयुर्हीत
18 Jan 2014 - 8:42 am | निवेदिता-ताई
मस्तच
18 Jan 2014 - 10:06 am | वेल्लाभट
अगागागागा! तोंडाला पाणी सुटलं हो फोटो बघून ! श्या!
भारी!
18 Jan 2014 - 8:15 pm | रेवती
सर्व प्रतिसादकांचे आभार.
नाना, तुमचेही आभार.
रमेशजी, आपल्या फर्माईशीची नोंद घेतली आहे.
धन्यवाद.