..

(१) तिखट्-मीठ लावून खाणे, पादेलोण घालणे हवे असल्यास
(२) दाण्याचं कूट घालून कोशींबीर
(३) दह्यातील कोशींबीर
(४) डोळ्यांवर चकत्या ठेवणे
(५) झाडांवरच राहू देणे छान दिसत आहेत. नशीबवान आहात तुम्ही "ग्रीन थंब" आहे तुम्हाला.
(६) ऑफीसात कॉमन जागेत नेऊन ठेवणे व पुण्य कमावणे
(७) सँडविच मधे घालणे

खालची मोठी काकडी सुमारे ३३ इंच लांब असून ९ इंच व्यासाची आहे तर दुसर्‍या काकडीचा व्यास १० इंचांपेक्षा अधिक आहे

तुम्हाला व्यासच्या ऐवजी परीघ म्हणायचं आहे का? दहा इंच व्यासाची, म्हणजे जाडीची, काकडी मी तरी आत्तापर्यंत बघितली नाही. चित्रावरूनसुद्धा जाडी लांबीच्या साधारण १/१० वाटते, १/३ नाही.

काकडीचा काही पदार्थ करण्याऐवजी त्या किसून त्याचा चेहेऱ्यासाठी पॅक करावा - विशेषत: उन्हाळ्यात खूप छान वाटेल. दहा इंच व्यासाची असेल तर किसण्याची गरज नाही. आख्खी काकडी आतून पोकळ करून चेहेऱ्यावर बसू शकेल.

सोबत काकडी मार्गारिटा प्यावी - तिची कृती अशी

चार कप फ्रोजन काकड्या (कप =२४० मिली)
तीन टेबलस्पून लिंबाचा रस (टेबलस्पून = १५ मिली)
अर्धा कप टकिला
अर्धा कप ट्रिपल सेक (नसल्यास टकिला पाउण कप घेऊन ऑरेंज इसेन्स टाकावा)
चार टेबलस्पून साखर (चवीनुसार कमीजास्त)

हे सगळं ब्लेंडरमध्ये घालून त्याचा काकड्यांचा बर्फाळ भुगा होईपर्यंत बारीक करायचं. वेळ असल्यास ही सुमारे अर्धा तास फ्रीजरमध्ये ठेवावी. सुमारे चार माइल्ड ड्रिंक्स होतात. ग्लासच्या कडेला लिंबू चोळून त्या मिठात बुडवून त्यात सर्व्ह करा. किंवा फेसपॅक लावून पडलेल्या असाल तर आपल्या सुहृदाने हे सगळं करून सर्व्ह केल्यास सौहार्द आणखीनच वाढतं, हे सुहृदाला समजावून सांगा.

की जय..
ह्या घ्या १. काकडी वापरून करता येणार्‍या पाककॄती..
२. काकडी वापरून करता येणार्‍या ८८२पाककॄती..
(गुगल्या)केशवसुमार
मला काकडी नुसती मिठ-तिखट लावून आणि दाण्याचे कुट, बारीक चिरलेली हिरवी मिरची आणि कोथिंबीर घालून जीर्‍याची फोडणी दिलेली कोशिंबीर ह्या दोनच प्रकारे खायला आवडते..
(निवडक)केशवसुमार
बाकी तळून, भाजून काकडी खाणारी माणसे मी युरोपात बघितली आहेत..बुळबुळीत लागते..इक..
पुण्यात अलका टॉकिज समोर द्वारका (?)नावाचे उपहारगृह आहे तिथे भेळेत काकडी घालतात...इक..इक..इक..
(स्मरणशील)केशवसुमार

उपासाची भाजी पण छान होते.
काकडीचे साल काढून बारीक चिरून घेणे. कढईत जि-याची फोडणी करून त्यात मिरच्यांचे तुकडे घालावेत. त्यात फोडी घालाव्यात. कढईवर झाकण घालून बारीक गॅस वर शिजू द्यावे. काकडीत पाणी असतेच. त्यामुळे ते लगेच्च शिजेल. हवे असल्यास वरून पाणी घालावे. चवीपुरते मीठ, साखर घालावे. दाण्याचा कूट घालावा. वरून कोथंबीर चालावी.
आई शप्पथ मस्त लागते !

काकडी दहा इंच व्यासाची असेल तर इकडे पाठवून दे. आख्खी काकडी आतून पोकळ करून चेहेऱ्यावर बसवेन.

नाहीतर तू तश्याच जपून ठेव. हॅलोविनला भोपळ्या ऐवजी त्याच कोर. शब्दश: `राक्षसी ` होतील .

मागे केळ्याचे सांदण (दुवा) दिले होते. त्यात केळ्याऐवजी किसलेल्या काकड्या वापरून काकडीचे सांदण करता येते.

काकडीच्या पाण्यात पोहे (पातळ पोहे) दडपून भिजवता येतात - बाकी मिरच्या मसाला चवीप्रमाणे - भरपूर काकडी वापरली जाते.

जबरी काकडोबा

अगदी कोवळ्या असतानाच जर का ह्या काकड्या काढल्या तर चविला बर्‍या लागतात का? तसे असेल प्रश्न सुटावा.

हिरवे सोटे आहेत! ;)

मिरच्या आणि सोटे दिसताहेत बाकी जबरी बरं का! :)

(मीठ + तिखट + काकडी आवडणारा)चतुरंग

घासकडवी यांच्या मार्गारीटाच्या कृतीपासून प्रेरणा घेऊन खालील पेय तयार केले आहे.

चार कप फ्रोझन काकडीचे चौकोनी तुकडे
पाऊण कप जिन
दीड टेबलस्पून लिंबाचा रस
चार टेबलस्पून साखर
वीसएक पुदिन्याची पाने

पुदिना सोडून सर्व पदार्थ मिक्सरमध्ये बर्फाच्या चुर्‍याप्रमाणे होईल इतपत बारीक करावे. पुदिन्याची पाने जराशी ठेचून त्यात मिक्स करावी. पिण्यापूर्वी अर्धा तास फ्रीझरमध्ये ठेवल्यास पुदिन्याचा स्वाद चांगला लागतो.
सुमारे चार लहान किंव तीन मोठी ड्रिंक्स होतात.

मलाही एखादी काकडी पाठवून दे! बाकी प्रियाली, तुझ्या घरच्या काकड्या तुझ्यासारख्याच खतरनाक दिसत आहेत!
तुझ्यामुळे मलाही चार नवीन पाकृ कळल्या. माहितीत भर पडली. स्वयंपाकाच्या अनुभवात भर पडणार नाही याचीही तेवढीच खात्री आहे.

(आळशी) अदिती

फार्मव्हील खेळतेस का नाही! ;-)

(खेळाडू!) अदिती

बापरे!! काकड्या आहेत का दोडके!!
कागदाचे बोळे करून घरातल्या घरात क्रिकेट खेळायला ब्याट म्हणूनही वापरता यावेत ;)

बाकी पाककृती या भागात प्रियाली नाव बघुन दचकलो.. शिर्षक (राक्षसी वगैरे ;) )मात्र लेखिकेच्या पूर्व लेखनाशी सुसंगत

अवांतर: वाळल्यावर काकड्यांना छान जाळी पडते.. त्याला रंग लाऊन शोपीस म्हणून ठेवा

या काकड्यांना कोल्हापुरकडे "वाळके" म्हणतात.
हि वाळके काकडीपेक्षा चवीला छान असतात.

ह्या कोवळ्या काकड्या खुप छान लागतात.
प्रियाली काकडीचे धोंडसही करतात, काकडीचे पुर्‍यांसारखे वडे करतात. काकडी ऋषीपंचमीला भाजी करतो त्या भाजीत घालतात.

या बहुदा मावळी काकड्या/ वाळके आहेत. खूप दिवस झाले खाऊन :(
असो पाहायला तर मिळाल्या.

कोयते पन छान होतिल...

मी आधी शीर्षक चुकून 'राक्षसी काड्या' असं वाचलं.. हॅहॅहॅ..

नारायण धारपांच्या एका कथेची आठवण झाली .त्यात सुरुवातीला पृथ्वीवर आक्रमण असेच होते. नंतर शेवट वाचताना अंगावर काटा येतो.
तसा काही प्रकार नाही ना ?

ज्वारीचे पीठ, बारीक चिरलेला कांदा, कोथिंबीर, मिठ. हिरव्या मिरच्यांचे तुकडे, जीरे पुड.
काकडी उकडा, मिक्सर मधून त्याचा ज्यूस करा आणि ह्या ज्यूस मध्ये वर दिलेले सर्व साहित्य मिसळा, आणि त्याचे थालिपीठ लावा.. अतिशय खमंग लागते..
(स्वयंपाकी)केशवसुमार
(भाज्या खायची आवड नसल्या मुळे मला आणि आमच्या चिरंजीवांना ,ह्या पध्दतीने आमची बायको थालिपीठात काय वाट्टेल त्या भाजा घालून खायला घालते )

मस्त आहेत काकड्या,तुम्ही कुठे असता उसगावात?...नाही म्हणजे जवळच असाल तर काकड्या घ्यायला येऊ... :D लोकल ग्रोसरी-स्टोर मध्ये देऊ शकता...इकडे भारतीय दुकानात दिसतात काही नविन होम-ग्रोअन प्रकार...

मस्त आहेत काकड्या. ४-ह मधे किंवा जत्रेत बक्षिस मिळायला हरकत नाही.

मजगे हुळी पण छान होते काकडीची..

१ काकडी , २ मुठी हरभरा डाळ , १ इंच आल्याचा तुकडा, हिरव्या मिरच्या ( चवीनुसार ), मीठ, जिरे, १ वाटी आंबट ताक, २ लाल मिरच्या, फोडणीचे साहित्य ( हिंग मस्ट ).

हरभर्‍याची डाळ ४० मि. भिजवा

हरभर्‍याची डाळ, आलं, हिरव्या मिरच्या, जिरे आणि मीठ एकत्र वाटून घेणे.
बारिक चिरलेली काकडी ( फार बारिक नको, २ से.मी ),
जितकी काकडी त्याच्या थोडं जास्त पाणी ( म्हण्जे १ कप काकडीचे तुकडे तर १.२५ कप पाणी ) एका पातेल्यात घेउन उकळायला ठेवा, त्यात काकडीचे तुकडे टाका, ५ मिनिटांत काकडी शिजेल. या उकळत्या पाण्यात वाटलेली डाळ टाका, अजून ५ मि. शिजवणे. गॅस बंद करून ताक घाला. वरून लाल मिरच्यांची फोडणी द्या . चिरलेली कोथिंबीर पेरा..

थोडासा काढीसारखा लागतो हा पदार्थ.

इंडियानापोलीस मध्ये कुठे कुठे फार्मर्स मार्केट असते ह्याचा शोध घ्या.

किंवा हे बघा.

आणि थोडेफार अधिक पैसे कमवा.

घरच्या काकड्या छान दिसत आहेत.
मला हिंग-तिखट-मीठ लावून आवडतात.
आणि काकडीचे (मोहरीमुळे नाकात कळ जाते, पण आवडते असे) लोणचे.

तांदूळाचे पीठ आणी गूळ घालून धिरडी छान होतात.
थोडे जायफळ पण घालता येइल.

काकडी (तुमच्या बागेकडे बघून या शब्दाचे अनेकवचनपण चालेल :) ) एका परातीत किसून घ्यावी.
त्यात चवीनुसार गुळ कुस्करावा. किसलेल्या काकडीच्या अंगच्या पाण्यात (आमच्याकडे हाच शब्द वापरतात) गुळ नीट विरघळला की त्यात तांदळाची पिठी हळु हळु मिसळून गोळा करावा. हा गोळा करताना वरील मिश्रणाचेच पाणी वापरावे, वरुन वेगळे पाणी ओतू नये. आणि मग या मिश्रणाचे पाण्याचा हात घेउन केळीच्या पानावर अथवा नॉनस्टिक (मराठी शब्द?) पृष्ठभागावर घारगे थापून छान गुलाबी/ बदामी (अशाच काहीशा ) रंगावर तळावे. आणि मग फडशा पाडावा (केले तर फोटु डकवावे (?))

यात तांदळाच्या पिठीऐवजी भाजणीच्या वड्यांचे पीठ पण वापरु शकता.
(मी येथे नवीन आहे त्यामुळे लिखाणात थोडे कमीजास्त सांभाळून घ्यावे. )

हे बघितलंच नव्हतं!!!
मस्तच आल्यात की काकड्या!!!
बाकी काकडीचे फारसे पदार्थ माहिती नसल्याने तिथे एस ओ डबल आर ई!!
:)