मश्रूम-फ्लॉवर फ्राय

साहित्य:
०) पाव किलो मश्रूम (शक्यतो पांढरे, काळपट नकोत)
१) पाव ते अर्ध्या किलोच्या दरम्यान फ्लॉवर
२) एक मध्यम आकाराचा कांदा
३) ४-५ मोठ्ठे चमचे तेल, शक्यतो जेवढा जिन्नस आहे त्याच्या अंदाजानुसार
४) तिखट, मीठ, हळद, आणि हिंग पावडर अंदाजे
५) भरपूर लाल मिरचीच्या बिया - पिझ्झावर घालायला मिळतात तशा
६) गरम मसाला/भाजीचा विकतचा मसाला/आले लसूण पेस्ट - हे सर्व ऐच्छिक, नाही वापरले तरी चांगला लागेल पदार्थ

कापाकापी:
प) मश्रूम आणि फ्लॉवर उभट कापून ठेवा.
फ) कांदा - आपले बोट न कापता जेवढा बारीक कापता येइल तेवढा बारीक कापा

कृती:
प्रकरण १: मश्रूम्स परतणे
य) पसरट कढईमधे २-३ चमचे तेल गरम करावे. गरमगरम तेलात मिरचीच्या बिया घालाव्यात, चांगल्या सणसणीत २-३ शिंका येतील असा खाट येउ द्या, मग तेलात मश्रूम टाकावे.
र) मश्रूम्स चांगले परतावे - मश्रूम्स ना थोड्या वेळानी पाणी सुटेल - पाण्याची वाफ होउन पाणी संपत आले की, हळद तिखट मीठ टाकून मश्रूम्स परतणे चालू ठेवावे.
ल) पूर्ण पाण्याची वाफ झाल्यावर गॅस बंद करा [ज्यांनी सुरुवातीला गॅस लावला नसेल त्यांनी ही पायरी वगळली तरी चालेल]

प्रकरण २: कांदा व फ्लॉवर परतणे
त) प्रकरण १-य) प्रमाणेच सर्व करावे. फक्त
त.१) पसरट कढईऐवजी मोठ्ठे भांडे घ्यावे - ज्यात शेवट मश्रूम्स, फ्लॉवर सर्व जिन्नस एकत्र मावेल एवढे मोठे भांडे लागेल
त.२) कांदा लाजून लाजून गुलाबी होईपर्यंत परतावा
थ) आता कांद्यावरच फ्लॉवर घालून खरपूस परतावा.
द) मंद आचेवर परता शक्यतो, आमच्या गॅसची आच कायम मंदच असते - एकतर मंद नाहीतर बंद
ध) कृपा करुन फ्लॉवरला झाकण ठेवून वाफ देऊ नका, शास्त्रीय कारण माहीत नाही पण चव बिघडते -
न) फ्लॉवर परतत असताना सगळे आवडीचे मसाले योग्य वेळेला घालावेत.

प्रकरण ३: मश्रूम्स, कांदा, फ्लॉवर युती
क) प्रकरण १-ल) मधे परतून ठेवलेले मश्रूम्स फ्लॉवरच्या भांड्यात ओतावेत
ख) हलक्या हाताने छान एकत्र करावे सगळे - अगदी एकजीव नका करु, काला व्हायचा.

पोळी, भात, ब्रेड, नुसतेच - कशाबरोबरपण/कसेपण खावा. खा म्हणजे झाले, वाया नका घालवू.

चित्र कम पुरावा:

आवराआवरी:

अविवाहीत असून मित्रांबरोबर रहात असाल तर -
च) कामवाल्या काकू येत असतील तर काय प्रश्नच नाही
छ) सिंक रिकामे असेल तर सगळी भांडी सिंक मधे टाकून डाराडूर झोपून टाका किंवा घराला कुलुप लावून, फोन बंद करुन ४-५ तास गायब व्हा
ज) सिंक रिकामे नसेल आणि डिशवॉशर असेल तर वापरा लगेच तो
झ) सिंक रिकामे नसेल आणि घरी डिशवॉशर पण नसेल तर रुममेटस किंवा अपार्ट्मेंट काहीतरी एक बदला.

विवाहित असाल/ बाकी उर्वरित साऱ्या शक्यता -
काय आयडियेची कल्पना नाय बुवा - सदसदविवेकबुध्दीनुसार निर्णय घ्या.

तळटिपा:
ट) हाच पदार्थ जरा कमी परतून, थोडेसा कच्चासर ठेवला तर चकणा म्हणून दारुबरोबर छान लागतो
ठ) दारु न पिणाऱ्यांनी निराश नका होउ - मांउटनड्यू किंवा तत्सम शरीराला हानिकारक थंड पेयाबरोबर चकण्यासारखा खा
ड) ग्रेव्ही पाहिजे असल्यास टोमॅटोची ग्रेव्ही करा आणि त्यात मश्रूम-फ्लॉवर्स बदाबदा ओता
ढ) मला स्वयपाकातले काहीही येत नाही परंतु, वरील एकच पदार्थ मी चांगला बनवतो असे जनमत आहे त्यामुळे कृतीमधे मुलभूत चुका आढळल्यास त्यांच्याकडे दुर्लक्ष न करता योग्य ते बदल करुन घ्यावेत