सुंगटांची हुड्डामेथी (कोळंबीची उडीदमेथी)

मूळ पाककृती अमिताबाय सलत्री यांची माझ्या सोयीनुसार बदलली आहे:

- - -
कोळंबी - अर्धा किलो

तांदूळ - एक मोठा चमचा
उडदाची डाळ - एक छोटा चमचा
मेथी - एक छोटा चमचा

एक मोठा कांदा
ओले खोबरे - एक वाटी (खोवलेल्या खोबर्‍याऐवजी सुक्या खोबर्‍याचा बारीक कीस मिळतो, त्यात नारळाचे दूध डब्यात मिळते, ते घातले.)

धणे - एक मोठा चमचा
मिरी - पाच कण
सुक्या लाल मिरच्या - १२ (मी चार घेतल्या - अमेरिकेत वाढलेल्यासाठी बनवायचे होते!)

घट्ट चिंचेचा कोळ - १ छोटा चमचा

आणखी तीन मोठे कांदे

- - -

१. कोळंबी - (अर्धा किलो) सोलून, काळा धागा काढून स्वच्छ करून ठेवावी

२. एक मोठा चमचा तांदूळ, एक छोटा चमचा उडदाची डाळ, एक छोटा चमचा मेथीचे दाणे - तव्यावर सुके भाजून थोड्याशा पाण्यात वाटावेत (मिक्सरमध्ये सुके भरड वाटून, मग थोड्याशा पाण्यात वाटणे मला सोयीचे गेले)

३. एक मोठा कांदा + वाटीभर खोवलेले खोबरे मंद आचेवर परतून गुलाबी करावेत.

४. एक मोठा चमचा धणे, चार सुक्या लाल मिरच्या (सलत्रीबाई १२ मिरच्या म्हणाल्या), ५ मिरी, सर्व कोरडे भाजून घ्यावे. परतलेला कांदा, खोबरे, भाजलेले धणे-मिरी-मिरच्या, १ छोटा चमचा चिंचेचा घट्ट कोळ एकत्र वाटावे.

५. तीन मोठे कांदे पातळ चिरून गोड्या तेलावर मंद आचेवर गुलाबी परतावेत. पॅनमध्ये कांदे एका बाजूला सारून कोळंबी मांडावेत. क्प्ळंबीची आधी एक बाजू भाजू/तळू द्यावी, मग उलटून दुसरी बाजू. पूर्णपणे शिजायच्या आधी बाजूला काढावी. (अमिताबाई कोळंबी परतून भांड्यातच ठेवतात - मला अती शिजून रबरासारखी झालेली कोळंबी तितकी आवडत नाही.)

६. आतापर्यांत खमंग परतलेल्या कांद्याच्या कापांमध्ये कांद्या-खोबर्‍या-मसाल्याचे वाटण घालून परतावा. थोडेसे पाणी घालून उकळी आणावी. कोळंबी घालावी. तांदळा-उडदा-मेथीचा वाटलेला गोळा घालावा.

७. उकळून रस मिळून येऊ द्यावा. तोवर कोळंबी पूर्ण शिजतात. याचा रस फार पातळ करू नये.