पाकातले चिरोटे

पाकातले चिरोटे
साहित्यः
२ वाट्या मैदा.
पाव चमचा मीठ
४ टे.स्पून कडकडीत तेल
२ टे.स्पून डालडा
तळण्यासाठी तूप किंवा रिफाइंड तेल
पाकासाठी २ वाट्या साखर
केशर / केशरी रंग (ऐच्छिक)
कृती:
१.मैदा चाळून मीठ व तेलाचे मोहन घालून मऊ भिजवावा. भिजवताना १टे.स्पून दही घालावे.
२.परातीत डालडा घेऊन हलके होईपर्यंत फेटावे, पांढरेशुभ्र झाले कि कोमट करावे.
३.मैद्याचे १० गोळे करून, तांदुळाची पिठी वापरून त्याच्या पोळ्या कराव्यात. ओल्या फडक्याखाली झाकून ठेवाव्यात.
४.मैद्याची एक पोळी घेऊन त्यावर फेटलेला डालडा कडेपर्यंत हाताने लावावा.त्यावर दुसरी पोळी ठेऊन त्यावर डालडा लावावा. असे पाच पोळ्यांवर लावावे. ही चळत व्यवस्थित दाबून तिची गुंडाळी करावी .
५.गुंडाळीचा कडेचा थोडा भाग कापून, एक सारखे अंगठ्याएवढे भाग कापावेत.
६.पोळपाटावर चौकोनी चिरोटे लाटावेत.
७.कढईत भरपूर तूप/तेल घेऊन मध्यम आचेवर दोन्ही बाजुनी गुलाबी रंगावर तळावेत.
८.चिरोटे तळून झाल्यावर चाळणीत उभे लावावेत म्हणजे तूप निथळेल.असे उरलेल्या पोळ्यांचे चिरोटे करावेत.
९.पाकाकरता जाड बुडाच्या भांड्यात २ वाट्या साखर, अर्धी वाटी पाणी व केशर घालून पक्का पाक करावा.
१०.गॅस मंद ठेऊनच एक एक चिरोटा त्यात बुडवून चाळणीत उभा निथळत ठेवावा. म्हणजे जास्तीचा पाक निघून जाऊन चिरोटे खुटखुटीत होतात.
वरील मैद्यात २० चिरोटे होतात.

टीपः आदल्या दिवशी चिरोटे करून हवाबंद डब्यात ठेवावे. म्हणजे तेल्/तूप निघून जाते.