माझा पहिला परदेश प्रवास (लंडन)

भाग पहिला -

मिसळपाव वर हा माझा पहिलाच लेखनाचा प्रयत्न, त्यामुळे लेखनातल्या चुका सांभाळून घ्या मिपाकरांनो !!

माझं ड्रीम डेस्टिनेशन होतं लंडन!! नवर्‍याबरोबरच जायचं असं ठरवलं होतं मी तेंव्हा :) खरं तर ४ वर्षांपूर्वी आई बरोबर UK ला जायची संधी आली होती मला, माझा भाऊ लंडन मध्ये होता त्यावेळी. तसं म्हणायला गेलं तर मला सहज शक्य होतं तिकडे जाणं पण मी नाही गेले. माझं स्वप्न होतं की लंडन ला जायचं तर ते मंदार बरोबरच :) आणि तसं मी माझ्या आईला सांगितलं होतं. आई सुद्धा काही म्हणाली नाही. लहानपणापासून आईला सगळं सांगायची सवय, त्यामुळे ह्याची कल्पना दिली होती आधीच, पण विश्वास होता की आपल्याला जायला मिळेल कधी ना कधी तरी. त्यामुळेच आईला तेंव्हाही हे कारण सांगू शकले. दादाला म्हणजे माझ्या भावाला सांगायची हिम्मत नव्हती त्यामुळे त्याला असच काहीतरी कारण सांगितलं.

तर आत्तापर्यंत तुमच्या लक्षात आलं असेल बहुदा की आमचा प्रेमविवाह. मंदार ला जेंव्हा मी हे सांगितलं तेंव्हा तो म्हणाला मला की एक ना एक दिवस तुला मी नक्की लंडन ला घेऊन जाईन. पण लग्नानंतर इतक्या लवकर जायला मिळेल असं वाटलं नव्हतं.

असंच ऑफिस मध्ये एके दिवशी मला नवर्‍याचा फोन आला आणि तो मला म्हणाला की तुझ्यासाठी एक सरप्राईज आहे. आपण लंडन ला जातोय January मध्ये. मी खुर्चीवरून उडायची बाकी होते फक्त ही बातमी ऐकून. तपशिलात विचारल्यावर मग कळलं की त्याला ३ आठवडे कामासाठी लंडन ला जायला लागणार आहे. खूप खुश होते मी. ही ट्रिप प्लान करायचं अजून एक कारण म्हणजे आमच्या लग्नाचा वाढदिवस होता ८ February २०१६ आणि आम्हाला तो लंडन मध्ये साजरा करायला मिळणार होता याचाही खूप आनंद होत होता.

आता मुख्य प्रश्न होता तो म्हणजे सुट्टीचा. एवढा खर्च करून जायचं म्हणजे ३ आठवडे तरी सुट्टी मिळाली पाहिजे सगळं पाहता आलं पाहिजे. त्यात माझी नोकरी नवीन, त्यामुळे एवढी सुट्टी मिळेल की नाही माहित नव्हतं पण Manager ला विचारल्यावर तो सुदैवाने लगेच तयार झाला आणि माझी सुट्टी मंजूर झाली. मग काय स्वारी खूष !! :) मग त्या दिवसापासून विसा च्या Application ची तयारी सुरु झाली . त्याचबरोबर विसा साठी लागणारे डॉक्युमेंटस , तिकडे लागणाऱ्या गोष्टी , खरेदी , तिकडे कुठे आणि कसं फिरायचं या सगळ्याची तयारी सुरु केली. तसं माझा नवरा आधी जाऊन आला असल्यामुळे त्याला सगळी माहिती होती पण तिकडे तो ऑफिस मध्ये गेल्यावर मला एकटीलाच फिरायचं होतं त्यामुळे मी याद्या करायला सुरुवात केली की काय काय बघायचं, कुठे जायचं कारण मला आणि माझ्या नवर्‍याला एकत्र फिरायला दोनच वीकेण्ड मिळणार होते म्हणून मग आम्ही ठरवलं की पैसे भरून ज्या जागा पहायच्या आहेत त्या एकत्र पहायच्या आणि ज्या जागा म्हणजे पार्क्स, संग्रहालयं आणि अजून काही अशी ठिकाणं आहेत जिथे एन्ट्री फी नाही आहे त्या जागा मी इतर दिवसांमध्ये बघायच्या. लंडन मध्ये ते एक बरं आहे की काही संग्रहालये, पार्क बघायला ते काहीही पैसे लावत नाहीत आणि ती इतकी मोठी आहेत कि आपला अख्खा दिवस जातो ते बघण्यात फक्त तुम्हाला आवड असली पहिजे. माझा अनुभव खूप छान होता संग्रहालये बघण्याचा, त्यावर नंतर सविस्तर लिहीनच.

टुरिस्ट विसा (६ महिने) ला अर्ज करण्यासाठीची किंमत साधारण ८००० रुपये आहे. आता कदाचित बदल झाले असतील. विसा साठी अर्ज करून ऑनलाईन Appointment नवर्‍याने घेऊन ठेवली होती. सगळ्या डॉक्युमेंटस ची जमवाजमव केली आणि गेले विसा ऑफिस मध्ये Appoitment च्या दिवशी. ऑफिस मध्ये आत गेल्यावर आधी सुरक्षा तपासणी झाली मग पुढे गेल्यावर प्राथमिक माहिती घेऊन त्यांनी एक टोकन दिले आणि थोडा वेळ वाट पाहायला सांगितली. आत गेल्यावर आधी ते विचारतात की तुमचा विसा नॉर्मल प्रोसेस ने अप्लाय केला आहे कि अर्जंट? कारण नॉर्मल असेल तर २१ दिवसाच्या आत येतो आणि अर्जंट असेल तर ३ दिवसाच्या आत येतो. झाल्यावर मग माझा टोकन नंबर उच्चारला आणि मी गेले तिथल्या एका खिडकीच्या इथे. माझ्याकडून एक फॉर्म भरून घेतला आणि सगळी डॉक्युमेंटस जमा करून घेतली. ते झाल्यावर बायोमेट्रिक चाचणी झाली आणि हे सगळे सोपस्कार पूर्ण झाल्यावर मी बाहेर आले. UK विसा प्रोसेस करण्यासाठी VFS Global नावाची एजन्सी आहे जी आपले डॉक्युमेंटस UK कौन्सुलेट ला पाठवते पण विसा साठी चा अर्ज आपल्याला UK Govt. च्या https://www.gov.uk/check-uk-visa या वेबसाईट वरच करावा लागतो. याबद्दल काही अधिक माहिती हवी असेल तर व्यनि करावा .

मला तसं थोडं टेंशन होतं की वेळेत विसा मिळतोय कि नाही कारण आमच्याकडे बरोब्बर २१ दिवस च होते हातात . माझ्या नवर्याला तसा विश्वास होता की विसा मिळेल, म्हणून त्याने तर तिकीट पण बुक केलं. आम्हाला दोघांना एकत्र जाऊन एकत्रच यायचं होतं आणि तिकीट खूप महाग होत होती आणि तोपर्यंत विसा आला नव्हता त्यामुळे करून टाकलं बूक. मला एका आठवड्यातच VFS global मधून मेसेज आला की विसा आला आहे पण हे समजलं नव्हतं कि विसा मिळाला आहे की नाही ते. मेसेज आला तेंव्हा मी ऑफिस मध्ये होते. Manager ला विचारून तडक BKC गाठलं आणि जाऊन पार्सल घेतलं . धडधडत्या मनाने उघडलं आणि पाहिलं तर विसा ची मोहोर लागली होती :) ते पाहिल्यावर इतका आनंद झाला म्हणून सांगू ! लगेच नवर्याला फोन करून कळवून टाकलं मग तोही खूष. आणि आता खऱ्या अर्थाने मी माझ्या पहिल्या वहिल्या परदेश प्रवासाला आणि माझ्या ड्रीम ट्रिप च्या तयारी ला सुरुवात केली. आता मी फक्त दिवस मोजत होते आणि तो दिवस आला २३ January २०१६.

क्रमश: