श्रावण

कर्नलतपस्वी's picture
कर्नलतपस्वी in जे न देखे रवी...
29 Jul 2022 - 6:14 pm

काळ्याशार पाटीवर
पांढरी शुभ्र रेघ
ग्रीष्माच्या पाठीवर
काळे काळे मेघ
खरपुस ताबुंस मातीवर
हिरवी चंद्रकळा
प्राजक्ताच्या झाडाखाली
मोतीयाचा सडा

सुखावली धरती
सुखावली मने
इवल्या इवल्या रोपानी
डुलती हिरवी राने

चिंब झाले मन
रुंजी घालतो साजण
उभा भाऊ दारी म्हणे
आला पंचमीचा सण

मन पाखरू पाखरू
पोचले आईच्या पायाशी
डोळ्यात श्रावण भरून
उभा साजण दाराशी

२९-७-२०२२

निसर्गपाऊसमाझी कविताकवितामुक्तकशब्दक्रीडा

प्रतिक्रिया

प्रचेतस's picture

29 Jul 2022 - 6:15 pm | प्रचेतस

खूपच सुरेख.

कर्नलतपस्वी's picture

29 Jul 2022 - 6:18 pm | कर्नलतपस्वी

मन सुखावलं.

यश राज's picture

29 Jul 2022 - 7:23 pm | यश राज

आवडली खूप

चित्रगुप्त's picture

31 Jul 2022 - 10:21 pm | चित्रगुप्त

खूपच सुघड, अर्थगर्भ कवन.
एक समजले नाही:

उभा भाऊ दारी म्हणे

आणि

उभा साजण दाराशी...

हे दोन्ही एकदमच, म्हणजे एका दारात भाऊ आणि दुसर्‍यात साजण, असे म्हणायचे किंवा कसे ? किंवा आमच्या बालबुद्धीला उमगलेले नाही असे ?

कर्नलतपस्वी's picture

1 Aug 2022 - 6:53 am | कर्नलतपस्वी

उभा भाऊ दारी म्हणे

आणि

उभा साजण दाराशी...

चित्रगुप्त जी धन्यवाद.

तीचा भाऊ तीला माहेरी घेऊन जाण्यासाठी आलाय.ती मनाने केव्हाच आईकडे पोहोचली असून, तीला भावाबरोबर जाताना पाहून पाणावलेल्या डोळ्यानी तीचा साजण दाराशी उभा आहे. जणू म्हणतोय लवकर ये मले तुझ्याविना करमणार नाही.

आसे दृश्य आहे.

" चार दिसावर उभा ओला श्रावण झुलवा,
न्याया पाठवा भावाला हिला माहेरी बोलवा "
शांताबाई शेळके

श्रीगणेशा's picture

1 Aug 2022 - 1:06 pm | श्रीगणेशा

मन पाखरू पाखरू
पोचले आईच्या पायाशी
डोळ्यात श्रावण भरून
उभा साजण दाराशी

खूप छान!

वामन देशमुख's picture

2 Aug 2022 - 3:15 pm | वामन देशमुख

आवडले श्रावण गीत!

---

(बालकवींची क्षमा मागून)

तपस्वी कर्नल लिहितो सुंदर
श्रावण महिन्याचे गीत,
मिपा वरती वाचुनिया
मग हर्ष माइना हृदयात!