भू-कवचा विंधून धरेच्या
गाभ्याशी जाईन
शून्य गुरुत्वाकर्षण तिथले
अधांतरी मोजेन
निंबोणीचे रोप कोवळे
चन्द्रावर रुजवीन
अंगाईचे शब्द बदलूनी
पुन्हा लिहून काढीन
जर्द तांबडी मंगळमाती
शनीवरी शिंपीन
शनि-मंगळ मग युती अनोखी
एकवार पाहीन
राहू-केतुची जोडगोळी मग
समक्ष बघण्यासाठी
चंद्रसूर्य कक्षांच्या अलगद
सोडवीन निरगाठी
सात अश्व सूर्याचे - त्यांना
थोपटीन प्रेमाने
त्यांचा दाणा , पाणी , खरारा
करीन मी निगुतीने
कृष्णविवर सैराट , भटकते
हुडकून मग काढीन
गळाभेट घेईन तयाची -
त्यात विरुन जाईन
मनोरथाच्या वाटेवर जरी
वास्तव पसरी काटे
त्या काट्यातून फूल फुलवी जो
त्याचे संचित मोठे
प्रतिक्रिया
7 Jun 2024 - 3:32 pm | प्रा.डॉ.दिलीप बिरुटे
छान. लिहिते राहा.
-दिलीप बिरुटे
7 Jun 2024 - 3:33 pm | प्रा.डॉ.दिलीप बिरुटे
-दिलीप बिरुटे
7 Jun 2024 - 5:51 pm | चौथा कोनाडा
हे आवडलं !
9 Jun 2024 - 11:13 am | अनन्त्_यात्री
प्रतिसादाबद्दल धन्यवाद.
13 Jun 2024 - 9:28 pm | चित्रगुप्त
ही कविता इंग्रजीत गूगल भाषांतर करून कृबु प्रतिमेसाठी वापरली असता खालील चित्रे आली:
(हे प्रयोदाखल करून बघितलेले आहे, बाकी हेतु काही नाही)
14 Jun 2024 - 10:44 am | अनन्त्_यात्री
टाईमपास कवितेला चार चाँद लावल्याबद्दल चित्रगुप्ताय नम:
सूर्याच्या सात घोड्यांपैकी १-२ गायबलेत. बहुधा माझी नजर चुकवून चरायला गेले असावेत.
13 Jun 2024 - 10:07 pm | कर्नलतपस्वी
कवीता सुंदर आहे.
चित्रगुप्तांचे उद्योग खतरनाक वाटले, पण तरी सुद्धा पुरक आहेत.
13 Jun 2024 - 10:26 pm | चित्रगुप्त
यात (आपले डोके अजिबात न वापरता) भाषांतर आणि चित्रनिर्मितीत संपूर्णपणे कृबुचाच वाटा आहे. नवनवीन प्रयोग करण्यातून ज्ञान मिळत राहील.
14 Jun 2024 - 1:06 pm | अथांग आकाश
कविता आवडली!
मी नजरचूकीने माथेरानच्या वाटेवर जरी शिर्षक वाचले होते :P
18 Jun 2024 - 9:45 pm | गवि
खूप सुंदर. एकदा सुरुवातीला "करेन" मग पुढील कडव्यांत "करीन" असे झाले आहे ते पुढील आवृत्तीत सर्वत्रच "करीन" करून घ्या.