सवा डॉलर चढाऊंगी (एक आध्यात्मिक दृष्टीकोन)

मित्रहो, सहज गाणं ऐकत ऐकत मला अचानक हा दृष्टांत झाला की ही लावणी नव्हेच!! ही तर एका ईश्वराच्या प्रेमात पडलेल्या कन्यकेने त्या ईश्वराला केलेली आळवणीच !! गाण्याची सुरुवात ऐकताच आपल्याला कन्यकेच्या आध्यात्मिक विचारांची जाणिव व्हायला लागते. गाण्याची सुरुवात काहीशी अशी आहे.

हिंदी फिल्मों में देखा जीवन का सारा लेखा।
पेडों के आगे बच्चन पेडों के पिछे रेखा॥

वरच्या ओळींमध्ये क्न्यकेला नव्वदच्या दशकात प्रसारीत होणारी रामायण ही मालिका अभिप्रेत आहे. 'हिंदी सिरीयलों मे देखा' हे मीटर मध्ये बसणार नाही म्हणून फिल्मों मे हा शब्द वापरला आहे. तर कन्यका म्हणते, या हिंदी रामायण मालिकेत जीवनाचं सारं सार आहे. ते कसं सांगायला ती म्हणते झाडाच्या पुढे बच्चन आहे. येथे कन्यकेला लक्ष्मण अभिप्रेत आहे. 'बच्चन' हा शब्द आध्यात्मिक अँगल लावून न बघणार्‍यांची दिशाभूल करु शकतो. कन्यका म्हणते झाडाच्या पुढे लक्ष्मण असून त्याने सीतेसाठी काढलेली लक्ष्मणरेखा ही झाडापलिकडे राह्यलेली आहे. म्हणजे माणूस हा नेहमी दुसर्‍यासाठी बंधने घालत असतो हे चपखलपणे सुचवते.

पुढे कन्यका म्हणते,
मामूली नहीं मैं लडकी खोलें सपनों की खिडकी ॥
अपनी ठंडी दुनिया को मैनें सपनो पे सेंका॥

येथे पुन्हा आध्यात्मिक दृष्टीकोन वापरण्याची गरज पडते. येथे ही कन्यका स्वप्न बघत नाहीये तर ध्यानधारणा करुन तिने कुंडलिनी जागृत होण्याची पायरी गाठली आहे. त्यामुळेच भर थंडीतही ध्यानधारणा करुन ती बाह्य वातावरणाचा आपल्या शरीरावर काही फरक पडू देत नाही. पुढल्या ओळीत भगवंताने आपल्याला बोलवावं यासाठी ती म्हणते,

मेरा शॉट रेडी है देवा ओके जल्दी कर देना झोली मेरी भर देना।
हिरोईन मुझे बना देना सवा डॉलर चढाऊंगी बदले में॥

म्हणजे आता आध्यात्मिक उन्न्तीसाठी तिने समाधी अवस्थेत जाण्याचा निर्णय घेतलाय. ती देवाला विनवते की , "देवा रे, हा माझा प्रयत्न सफल होउ दे, म्हणजे मी बाकीच्यांच्या दृष्टीने हिरोईन ठरेन" आणि तसं झालं तर ती सवा डॉलर म्हणजे आपला पुढला जन्म देवाला अर्पण करेल. येथे ही कन्यका नवस करण्याच्या प्रथेला ही & हि कमेंट देण्यासाठी जणूकाही आपण नवस करतो आहोत असे भासवते.

पुढे असलेला कोरस म्हणजे षडरिपूंनी तिला घातलेली भुरळ आहे.
कोरस:
चल गं रानी गाऊया गानी क्याम्येर्‍याच्या संगं
आनं क्लोजंपंवाली लेन्सं लगी है दिखा दे अपने रंगं.

तर हे षडरिपू म्हणतात, ''बाई गं, समाधी घेऊन हिरोईन होण्यापेक्षा या क्यामेर्‍यासमोर तुझे अभिनयाचे रंग उधळ, गाणी गायला आम्ही तुझ्यासोबत आहोतच!!"

पुढील कडवं;
रंगीन पोषटर मेरा गलियों में दिखाई दे।
घर घर के रेडियो मेंभी मेरे गीत सुनाई दे॥
कोरसः
गं बाई हिची गाणी वाजली गं बाई हिची पायरसी झाली
आऽऽणि हिच्या प्रिमीयरला युएसंहूनं माधुरी आली

कन्यका म्हणते, "देवा रे, खरंच तू आहेस का? मी काय म्हणतेय ते ऐकतोयेस का? समाधीनंतर माझी पोस्टर गल्लीगल्लीत लागू देत आणि प्रत्येक घरच्या रेडिओत माझ्या सत्संगांची गाणी ऐकू येऊ देत." षडरिपू कोरसमधून तिला भुरळ पाडायला म्हणतात ," बाई गं, क्यामेर्‍यासमोर तुझं गुणप्रदर्शन केलंस तर तुझी गाणी पायरसी होण्याइतपत फेमस होतील. तुझ्या सिनेमाच्या प्रिमीयरला माधुरी येईल'.

त्यांना न जुमानता ही कन्यका आपला धोशा चालूच ठेवते;

हर कोई फ्यान हो मेरा आणि ऑटोग्राफं माँगे ।
संग फोटो खिंचवाने की सब लोग दुहाई दे।
दुबली सी कमर के ठुमके सिलवर जुबली कर देना झोली मेरी भर देना।
हिरोईन मुझे बना देना सवा डॉलर चढाऊंगी बदले में॥

ती म्हणते की सर्व जण माझे फ्यान होवोत आणि माझी स्वाक्षरी मागोत (पण मी तोवर समाधी घेतलेली असेल.). माझ्या समाधीस्थानी फोटो काढण्यासाठी लोकांची रीघ लागो आणि हे जे षडरिपू मला भुरळ घालतायेत त्यांच्या नखरेल ठुमक्यांची खुश्शाल सिलवर जुबली होऊ दे. पण मी घेतलेला निर्णय सफल होण्याचा आशीर्वाद देऊन माझी झोळी भर जेणेकरुन मी तुझ्या दरबारी हिरोईन होईन.

तूर्तास इतुकेच !! ;)