मात्र रात्रीची गोष्ट भाग २

मागील भाग - १

स्थळ - वेळ - पात्र - नेहेमीचेच.

(पहिला पेग होवुन गेला आहे, वैचारीक चर्चा सुरू आहे अशी जागृत अवस्था अशातच पेग २ आगमन)

मी - घे ! फिश फ्राय चांगलं आहे... सध्या पिंडाचं गोळं खावुन खावुन वैतागला असशील..

तो- हं... काय करणार परंपरा असतात, त्या पाळाव्या लागतात... नाही पाळल्या तर बाप्पा ढुंगणावर टिमकी वाजवेल ना! बर ते जावु दे, ती हल्ली लिहित नाही...

मी - नाही लिहित... टिंगल होते म्हणे

तो - हं.. पुरषोत्तममधे गाजणारे नंतर समाजापुढे यायला घाबरतात हेच खरे

मी - जावु दे ना आपल्याला काय करायचे? तो बघ कसे वैचारीक लिहतो हल्ली..

तो - वैचारीक ? दे सोडुन, फार्मुला लेखन आहे ते

मी - फारमुल्ला ? तो कसा आहे

तो - फार जुना फार्मुला आहे.. मागल्या शतकात एका मोठ्या इतिहाससंशोधकाने वापरला होता, तसेच एका महान लेखिकेने वापरला होता.

मी - अरे पण आहे काय हा फारमुल्ला?

तो - सांगतो की ... समज अ, ब, क, ड या चार संख्या आहेत. अ हा ड पेक्षा लहान आहे हे सिद्ध करायचेच असे आधीच ठरवायचे..

मी - हं.. बर..

तो- विविध संदर्भ वगैरे शोधुन, इकडुन तिकडुन पुरावे मिळवुन अ हा ब पेक्षा आणि क हा ड पेक्षा लहान आहे हे सिद्ध करायचे.. शब्दांचे फुलोरे मांडुन, सजवुन लेख तयार करायचा आणि सगळ्यात शेवटी लिहायचे यावरुन सिद्ध होते अ हा ड पेक्षा लहान आहे... आहे काय आणि नाही काय ?

मी - अरे पण... ब हा क पेक्षा लहान आहे हे कोण सिद्ध करणार ? ते नको का करायला ?

तो- वेडाच आहेस. असे करायला लागल्यावर अ हा ड पेक्षा नेहमीच लहान आहे हे सिद्ध होत नाही ना ... कधी कधी अ हा ड पेक्षा मोठा असतो

मी - मग काय अर्थ ह्याला...

तो - तीच तर गंमत असते. ब हा क पेक्षा लहान आहे की नाही हे सिद्ध करायचेच नाही. त्याची अनेक कारणे असतात..

मी - काय काय ?

तो - एक तर काही वेळा ब हा क पेक्षा मोठा असतो त्यामुळे तसे मान्य केले तर अ हा ड पेक्षा लहान आहे हे सिद्ध होत नाही, आणि करायचेच झाले तर खुप अभ्यास करावा लागतो, जो शक्य नसतो..

मी - हं.. अजुन..

तो - किंवा ब हा क पेक्षा लहान असला तरी क हा ड पेक्षा लहान आहे हे किंवा अ हा ब पेक्षा लहान आहे हे सिद्ध केलेले चुकीचे असते..

मी - हं..

तो - किंवा अ हा सगळ्यांपेक्षा मोठा असतो.. कारण दिलेला संख्या क्रम गुणवत्तेच्या उतरत्या मुल्याने असतो...

मी - हं..

तो - किंवा अ, ब, क, ड ही तुलना करण्यायोग्यच नसतात, पण ओढुन ताणुन अ ची मानहानी करण्यासाठी केलेला हा उपद्व्याप असतो

मी - अच्छा असा सोपा फारमुल्ला असेल तर मी ही दोन चार वैचारीक लेखन पाडतो की..

तो - कशाला? थोडी फार इज्जत शिल्लक आहे तुझी ती का घालवतोस..

मी - मग काय करु ?

(पेग २ समाप्त)

तो - वैचारिक लेखन सोडुन बाकी काहीही कर .. हे तर चालुच रहाणार.. तोवर आपलं जहाल आणि मादक चालु ठेवु...खास परदेशी माल आहे

मी - मग काय...करा रिपीट..

तो - करा करा. सहज सहज होत असेल तर करा रिपीट...

मी - येस्स रिपीट... पण... सहजच परवानगी असेल तरच कारण दुस-या पेगानंतर जे जे बोलु ते रिपोर्ट हायकमांडला जातात ...

(भाग २ समाप्त)