घाट चढा आता

मंडळी, आपली हिरो अन हिरवीन प्रवासाला निघालेय. त्यांची गाडी जोरात जावू द्यायची की हळूहळू ते आपणच ठरवूया.
सादर आहे "घाट चढा आता" लावणीच्या दोन आवृत्या एकाच वेळी, एकाच धाग्यात... (ढॅण.. ढॅण्...ढॅणाण...)

(राजेश घासकडवींचे अन Nile यांचे खास आभार. अन घासकडवींनी खासकरून ४ थे ("घास भरवण्याचे") कडवे सुववले त्याबद्दल)

हळूहळू घाट चढा आता

घाई नगा करू सबूरीनं घ्येवा
चढाईचा चिकना ह्यो रस्ता
राया तुमी हळूहळू घाट चढा आता ||धृ||

खाली अन वर अवघड घाट
मधी हाये ही सपाट वाट
आक्शिलेटर दाब दाबूनी...
आक्शिलेटर दाब दाबूनी, वैताग आलाय नुसता
राया तुमी हळूहळू घाट चढा आता ||१||

कोरस :
दाजी हळूहळू घाट चढा हो आता...
पाव्हनं हळूहळू घाट चढा की आता...

दोन बाजूंचे डोंगर दोन मधून जातीया वाट
झर्‍यालाबी पानी सुटलं वाहे दुथडी पाटं
थांबा थोडं हितं जरासं...
थांबा थोडं हितं जरासं, कंटाळा आलाय नुसता
राया तुमी हळूहळू घाट चढा आता ||२||

कोरस :
दाजी हळूहळू घाट चढा हो आता...
पाव्हनं हळूहळू घाट चढा की आता...

मंदिर हाये माथ्यावरती कळस दिसतोया लांबून
ज्येवन खानं करायचं का तिथं थोडं थांबून
पुढची सगळी तयारी करते...
पुढची सगळी तयारी करते, ज्येवाया तुमी बसा
राया तुमी हळूहळू घाट चढा आता ||३|| (वरीजनल कडव्यात लय भारी बदल हाये. कोनाला लागत आसलं तर विचारा. व्य. नी. केला जाईल.)

कोरस :
दाजी हळूहळू घाट चढा हो आता...
पाव्हनं हळूहळू घाट चढा की आता...

बगा ह्ये ताट तयार झालं
बघूनशान तोंडाला पानी सुटलं
तुमच्या हातानं लाडीगोडीनं...
तुमच्या हातानं लाडीगोडीनं, घास भरवा की आता
राया तुमी हळूहळू घाट चढा आता ||४||

कोरस :
दाजी हळूहळू घाट चढा हो आता...
पाव्हनं हळूहळू घाट चढा की आता...

मंडळी, ह्यी झाली पयली लावनी. गाडी लय हळूहळू जात व्हती घाटातनं. कोनाला जोरात गाडी हाकायची आसल तर धृपदात खालीलप्रमानं बदल करा अन जोशात घ्येवून जावूद्या गाडी. काय?

घाई जरा करा, पटकन जावा
चढाईचा चिकना ह्यो रस्ता
अहो राया तुमी जोरात घाट चढा आता
अहो सजणा तुमी जोशात घाट चढा आता ||धृ||

-
तुमचाच,
पाषाणभेद (आपलं दगडफोड्या वो)
०१/०४/२०१० (हे एप्रिल चे प्रथम फुल वाचकांना अर्पण करतो.)