दोष

मिसळलो त्यांच्यात ना मी, पाडले एकटे मला
पाहून संधी; काढून वेळ, दोष लावला मला ll १ ll

दिवसातले डावपेच रात्री, टाकायचे ठरवले तयांनी
रात्र त्यांची चोरली मी, हा दोष लावला मला ll २ ll

सभ्य कृतीत चौर्य, काय लागावी झोप तयांना
स्वप्ने तयांची चोरिली मी, हा दोष लावला मला ll ३ ll

फेडले वागलेले त्यांनी, सोने-पैसा लुप्त झाला
परीस त्यांचा चोरला मी, हा दोष लावला मला ll ४ ll

सजा तयांना द्याया ईश्वरे, योजून धाडिले संकटाला
कृपा ईश्वराची चोरली मी, हा दोष लावला मला ll ५ ll

झाले रिक्त कर्माने ते, परी मुळी ना पीळ गेला
चोरले मी पुण्य त्यांचे, हा दोष लावला मला ll ६ ll

पितळ झाले उघडे तयांचे, वाचा फुटेना बोलायला
शब्द त्यांचे चोरले मी, हा दोष लावला मला ll ७ ll

-सार्थबोध