पिंपळपान.....

सप्रेम नमस्कार !
सकाळी एक छान ईमेल आले , त्यात एक सुंदरसे पिंपळपान होते, ते पाहून सहज काहीतरी(च ?) सुचले ते खरडले आहे.बघा आवडते का .....

पिंपळपान.....

तारुण्याचे पिंपळपान
त्यावर लिहुनी प्रीतीगान
अर्पण करते तुला मुकुंदा,
देशील का रे हृदयी स्थान?

शीतल वारा अन् जलधारा
अशा झोंबती कांतीला,
कवेत घेवून मला सख्या रे
विसावू दे बाहूवर मान !

विरह तुझा मज मुळी खपेना
तुजविण पळभरही करमेना ,
भरकटते मी तुला शोधण्या
मनी मानसी तुझेच ध्यान !

मत्सर वाटे वेणूचा त्या
अधरांवर तव विराजमान
सांग मला तू , मदनमोहना,
कशी सावरू? , मी बेभान !

चित्तचोरटा गवळी रे तू ,
धेनू पण बघ खुळावल्या
मी तर अजुनी यौवनात या,
कसे रहावे मज अवधान?

कोमल नाजुक भाव मनींचे
असे उमटले त्याच्या गाली,
मुक्त विहरणारे ते झाले
लाजून चूर्.....पिंपळपान !