सैनिक

शाळा संपल्यावरही केबिनमध्ये 
दिवा जळता ठेवून 
योजना आखत राहणारे मुख्याध्यापक 

कलत्या दिवसावेळी दमून येऊनही
'पुस्तक हवे' म्हणल्यावर 
उत्साहाने सायकल काढणारे बाबा 

तापाने फणफणत असूनही 
थंडीत चार वाजता उठून 
अभ्यासाआधी चहा देणारी आई

स्वत:ची दिवाळी मनाआड टाकून 
माझ्यासारख्या अनेकांना 
उत्सवासाठी घरी नेणारा एसटीचालक

महायुद्धाच्या पटावरचे लक्षावधी छोटे सैनिक 
कदाचित असेच असतील नाही?… 
जीव विझू आला तरीही 
शेवटच्या श्वासापर्यंत…. 
मनापासून कर्तव्य बजावणारे ! 

-- अमेय