तुझी आठवण कुंद कुंद दाटून येते.
अनावर ठसठसते,
रक्तासारखी ठिबकते.
दिशांच्या कोनात विझून गेलेले हळवे पक्षी जागे होतात,
उगाच चिवचिवतात,
श्वासांच्या फांदीवर घट्ट रुतून बसतात.
क्षितिजावर सांडलेले रंग सुटतात ;
अलवार आकाशावर दिशाहीन फुटतात.
तुझे भास प्राणांतून विजेसारखे लखलखतात,
धारदार पात्यासारखे आरपार जाणिवेवर फिरतात.
तूझ्या असण्याच्या शक्यतांच्या सीमारेषेवर
जीव इंद्रधनुष्यासारखा सततच अधांतरी ..!
- डॉ. सुनील अहिरराव