॥स्तवन धरणीमातेचे ॥

पृथ्वीदिनानिमित्त धरणीमातेचे स्तवन
पाण्यापासुन निर्माण झाली । पंचभूते ही तिच्यात आली ।
शेषनागाने भार वाहिला । नमस्कार माझा धरणीमातेला ।

एक भाग भूमी तीन भाग पाणी । तिच्या अंतरी नवरत्न खाणी ।
सप्तसागराचा वेढा जियेला । नमस्कार माझा धरणीमातेला ।

सूर्याभोवती स्वतः फिरते । म्हणोन दिवस रात्र होते ।
स्नानसंद्यादी कर्म करण्याला । नमस्कार माझा धरणीमातेला ।

गिरी शिखरे पर्वत रांगा । गंगा यमुना भिमा चंद्र्भागा ।
भारत खंड पवित्र केला । नमस्कार माझा धरणीमातेला ।

उत्तम बीजे सुपिक माती । अन्न धान्य ही विपुल होती ।
जीवन देते सकळ विश्वाला । नमस्कार माझा धरणीमातेला ।

कितेक धातु लहान मोठे । तेलाचेही अनंत साठे ।
तिच्या अंतरी ही सर्व कला । नमस्कार माझा धरणीमातेला ।

अनेक जंगले विशाल कुरणे । कित्येक नद्या कित्येक धरणे ।
पाणी पुरविते सर्व विश्वाला । नमस्कार माझा धरणीमातेला ।

नव खंडाची वसुंधरा ही । सकळ प्राणी मात्रांची आई ।
आधार देते समस्त जीवांला । नमस्कार माझा धरणीमातेला ।