ऐन वसंतात बाई का गं उदास कोकिळा
नवी पालवी देहाला अन मनाचा पाचोळा ||धृ ||
भरल्या अंगी भिनला ओल्या व्यथेचा गारवा
कोर्या मनात घुमला तुझ्या प्रीतिचा पारवा
झुले काळीज अंगणी आठवांचा गं हिंदोळा ||१||
मेंधीच्या गं पानामधी जीव गुंतला गुंतला
नवतीचा रंग गोरा कसा खुलला खुलला
हळदीच्या उन्हामंधी सोनचाफा झाला खुळा ||२||
मन कावरं बावरं , मन केवड्याच रान
किती सावरू आवरू आज सुटले हे भान
किती जपून ठेवलं तरी लागल्या गं झळा ||३||
नाही संपला अजुनी सये तुझा वनवास
तुझी भेगाळली धरा तरी अंबराचा ध्यास
उभा पेटला वणवा सारा करपला मळा ||४||
सनईचा सूर का गं असा बेसूर लागला
वेदनेचा हा सोहळा चारचौघात गाजला
किती दाबला हुंदका येती आतूनच कळा ||५ ||
ऐन वसंतात बाई का गं उदास कोकिळा
नवी पालवी देहाला अन मनाचा पाचोळा ||
- मनिषा नाईक (माऊ )
प्रतिक्रिया
28 May 2012 - 4:26 pm | शैलेन्द्र
चांगला प्रयत्न..
:)
पु ले शु.
28 May 2012 - 5:21 pm | चौकटराजा
आपली ही कविता वाचून तृप्त झालो. सलग प्रवाही व अर्थपूर्ण कसे लिहावे याचा उच्चतम नमूना ! आपल्या या कविते वरून माझे आवडते गवई पं. कुमार गंधर्व यांची एक बंदिश आठवली ही बहार रागात आहे.
ऐसो कैसो आयो रिता रे
अंबुवा पे मोर ( मोहर) ना आयो
करे ना गुंजार ए भवरारे
पीर बजो कोयलकी रंग ना खिलो .......
"नवी पालवी देहाला अन मनाचा पाचोळा" हा तर कहर आहे .
म्ह्णणजे या " सार्यांच्या गर्दीत मी एकटा एकटा " अशा सारखा विरोधाभास !
आणखी कविता लिहाच !
28 May 2012 - 6:13 pm | पैसा
मिपावर पहिल्या कवितेचं स्वागत. चांगलं लिहिताय. लिहीत चला!
29 May 2012 - 12:03 am | जोशी 'ले'
मस्त, आवडली कवीता... :-)
29 May 2012 - 10:29 am | अमृत
कविता आवडली :-)
अमृत
4 Jun 2012 - 12:03 am | रघु सावंत
नाही संपला अजुनी सये तुझा वनवास
तुझी भेगाळली धरा तरी अंबराचा ध्यास
उभा पेटला वणवा सारा करपला मळा ||४||
सनईचा सूर का गं असा बेसूर लागला
वेदनेचा हा सोहळा चारचौघात गाजला
किती दाबला हुंदका येती आतूनच कळा ||५ ||
माऊ मस्त जमलीय की कविता
रघू