अहो पाव्हनं, अंमळ घ्या विसावा ,

सूत्रधार :-
सळसळ नागावानी डौलदार चाल हिची
झळझळ सोन्यावानी झळकते काया हिची ..

खाण रुपाची, नार गुणाची , कुण्या गावची,
कुण्या रावाची, कुण्या नावाची, ही नार कोण ...

गुलाब मोगरा शेवंतीला , तुझा चेहरा हाय भारी
रूप देखणं, चतुर बोलणं , लाखा मधे तू भारी

नटी :
मी नार लई भारी ,
गार होती बघणारी
माझी कीरत ही न्यारी ,
माझी प्रीत तुम्हावरी----

अहो पाव्हनं ...
अहो पाव्हनं ...

अहो पाव्हनं,
अंमळ घ्या विसावा ,
विडा हातून,
माझ्या हा घ्यावा ..

बघा सांज, ही येई दाटून ,
हूर हूर, मनात भरून,

अश्या वेळी, कशाला दुरावा
विडा हातून, माझ्या हा घ्यावा ..

शिणगार,
माझा हा पहावा,
संगतीत ,
शीण घालवावा,

चंद्रापार, मला फिरवून,
ओंजळीत, तारे भरून ,

तुम्ही मला, गजरा माळावा ,
विडा हातून, माझ्या हा घ्यावा ..

आज आला,
जीवाचा हा रावा ,
नित रोज ,
मला हा भेटावा ..

काय करू , प्रीत ही वेडी ,
कशी सरते, ही रात ही थोडी

मावळतीचा , हा चंद्र थांबवावा ..
विडा हातून, माझ्या हा घ्यावा ..

हो .. विडा हातून, माझ्या हा घ्यावा ..

-- सागर लहरी १२.१२.२००९