आंब्याचे गोड तिखट लोणचे

साहित्य ----

राजापुरी कैरी २ किलो
गूळ १ किलो
लोणचे मसाला १०० ग्राम
मिरची पावडर १ टेबल स्पून
कढीपत्ता १ वाटी
मीठ पाव वाटी (आवडीप्रमाणे कमी जास्त)
लवंग १०
मिरे १५
धने २ टी स्पून
सुक्या मिरच्या १०
तेल ३०० ग्राम
पाणी २०० मिली

कृती -----

राजापुरी कैऱ्या आणून धुवून सोलून घ्याव्या. नंतर त्यांच्या हव्या त्या आकाराच्या फोडी करून घ्याव्या.(बाठी सकट)
फोडी उन्हात एक दिवस वाळवून घ्या.

दुसऱ्या दिवशी एका पातेल्यात (फोडी बुडतील इतके ) पाणी उकळावे आणि त्यात वाळलेल्या फोडी टाकून ५ मिनिटे उकळू द्यावे ५ मिनिटानंतर फोडी काढून निथळायला ठेवाव्या.

कढीपत्ता धुवून निथळून घ्यावा.
सुक्या मिरच्यांचे २/२ तुकडे करून त्यातील बिया वेगळ्या कराव्या.

गूळ बारीक चिरून घ्यावा.
आता एका पातेल्यात ३०० ग्राम तेल टाकून तापवावे.

चांगले तापल्यावर त्यात लवंग मिरे टाकावे.
तडतडल्यावर कढीपत्ता,धणे सुक्या मिरच्या,हिंग टाकावे. मिरचीच्या बियाही टाकाव्यात.

आता त्यात बारीक चिरलेला गूळ टाकून ढवळत रहावे.

गूळ फसफसू लागला की त्यात मिरची पावडर व लोणचे मसाला व मीठ घालून चांगला परतावा. तेल सुटू लागताच त्यात २०० मिली.पाणी घालून उकळावे. उकळ येताच त्यात कैरीच्या फोडी घालाव्या व घातलेले पाणी आटेपर्यंत उकळावे. मधून मधून ढवळत रहावे. (नाहीतर बुडाला जळण्याची शक्यता असते.)