अभाविपची आक्रमक धर्मांधता...

शिक्षणक्षेत्रात आपल्या रचनात्मक आंदोलनामुळे आणि संस्कारशील तरुणांच्या संघटित ताकदीमुळे स्वतंत्र अस्तित्व तयार केलेल्या अखिल भारतीय विद्यार्थी परिषदेवर दहशतवादी कारवायांमध्ये सहभागी असल्याचे गंभीर आरोप लावले जात आहेत. मालेगाव शहरातील नूरानी मशीद भागातील भिकू चौकात गेल्या 29 सप्टेंबर 08 रोजी रात्री झालेल्या स्फोटात 5 जण ठार झाले होते. या स्फोटामागे 'अभाविप'चे कार्यकर्ते असल्याचा आरोप समोर आला आहे.

आजवर दहशतवादी कारवायांमध्ये मुस्लिम समाजाचा हात असल्याचा आरोप केला जात असताना त्यात आता हिंदुत्ववादी विचारांच्या संघटनांचाही हात असल्याची माहिती प्रथमच समोर आल्याने देशभर या प्रकाराने खळबळ माजली आहे. विशेषतः या प्रकरणी अभाविपमध्ये 5 वर्ष पूर्णवेळ कार्य केलेल्या साध्वी प्रज्ञासिंह ठाकुर यांना अटक करण्यात आल्याने या स्फोटांना सरळ अभाविपशी जोडून पाहिले जात आहे.

आजचा विद्यार्थी हा उद्याचा नव्हे तर तो आजचाच नागरिक आहे. या नागरिकांमध्ये प्रखर राष्ट्रप्रेम, संस्कार आणि शिस्त भिनविण्याची गरज आहे. शिक्षणक्षेत्रातील सर्व घटक एक परिवारातील सदस्य तर विद्यार्थी हा त्यातील केंद्रबिंदू आहे, याच भूमिकेवर गेल्या 58 वर्षांपासून अभाविपचे काम चालले आहे. 9 जुलै 1949 रोजी मुंबईत काही प्राध्यापकांनी एकत्र येऊन स्थापन केलेल्या या संघटनेने गेल्या 58 वर्षांच्या काळात विद्यार्थ्यांची आंदोलने आणि चळवळींना नवी दिशा दिली आहे. या सोबतच दहशतवाद या विषयावर नेहमीच जनजागृती करताना आक्रमक भूमिका घेतली आहे. संघटनेने केलेल्या या कामांना आता स्फोटाचा कलंक लागू पाहतो आहे.

असे असले तरीही सुमारे 20-25 वर्षांपूर्वीचा आंध्र प्रदेशातील उस्मानिया विद्यापीठातील आणि केरळातीलही दहशतवादाशी लढा देऊन तो संपविण्याचे श्रेय आजही या संघटनेला जाते. किंबहुना या वेळी परिषदेच्या अनेक कार्यकर्त्यांना जीवही गमवावा लागला आहे. श्रीनगरच्या लाल चौकात राष्ट्रध्वज फडकविण्याचे आव्हान असो, चंद्रपूर आणि गडचिरोलीतील नक्षलवाद असो किंवा सध्या परिषदेच्या माध्यमातून चालविले जाणारे बांग्लादेशी घुसखोरीच्या विरोधातील आंदोलन असो अभाविपने दहशतवादाच्या विरोधात नेहमीच कठोर पावले उचलली आहेत, अशा परिस्थितीत 'अभाविप'वर होणारा आरोप शंका निर्माण करणारा आहे. अभाविप सारख्या संघटनेचा यात प्रत्यक्ष संबंध नसेलही कदाचित पण एकेकाळी संघटनेत काम केलेल्या साध्वींमुळे तो जोडला जाणे साहजिकच आहे. एकदा संघटनेत काम करून गेलेली व्यक्ती वैयक्तिक आयुष्यात काय करते त्याच्याशी आमचा काय संबंध असा पवित्रा अभाविपने घेतला आहे. साध्वी प्रज्ञा यात खरोखर दोषी असल्यास तिला शिक्षा झालीच पाहिजे असेही जाहीर करून टाकले आहे.

कोण या साध्वी?

मालेगावच्या स्फोटात अटक करण्यात आलेल्या साध्वी प्रज्ञा या अभाविपच्या पाच वर्ष पूर्णवेळ कार्यकर्त्या होत्या. विद्यार्थी दशेत विद्यार्थ्यांच्या अनेक आंदोलनांचे त्यांनी नेतृत्व केले आहे. परिषदेत काम केल्यानंतर त्यांनी संन्यास स्वीकारला असून अतिशय प्रखर व जहाल वक्ता म्हणून त्यांच्याकडे पाहिले जाते. साध्वी प्रज्ञा यांच्यासह या कटात सहभागी असलेल्या आणखी दोघांना पोलिसांनी ताब्यात घेतले आहे. तर या कटासाठी प्रशिक्षण देणा-या माजी लष्करी अधिकारी मेजर प्रभाकर कुलकर्णी व मेजर रमेश उपाध्याय यांनाही ताब्यात घेण्यात आले आहे. या सर्व घडामोडींच्या बाबतीत आणि अटक करण्यात आलेल्याaबाबत दहशतवाद विरोधी पथकाने अद्याप कोणतीही अधिकृत माहिती जाहीर केली नसली तरीही सर्व जण हिंदू जनजागरण मंचचे सदस्य असल्याची माहिती समोर आली आहे. त्यामुळे हा खरोखरच हिंदुत्ववादी संघटनांप्रणित दहशतवाद आहे की काय अशी भीती व्यक्त केली जात आहे.

कुठे चाललोय आपण?

जर या दहशतवादाचे रूप खरोखरच तसे असल्याचे सिद्ध झाले तर देशाच्या एकतेच्या दृष्टीने मात्र ते प्रचंड धोक्याचे ठरणार आहे. आजच्या घडीला जाती-धर्मातील तेढ प्रचंड वाढली असून रोजच वेगवेगळ्या भागांमध्ये दंगलींच्या बातम्या समोर येऊ लागल्या आहेत. त्यातच प्रांत व भाषिकवादही देशाच्या एकतेला धोकेदायक ठरत आहे.

अशा परिस्थितीत यापूर्वी केवळ जातीय दंगलींच्या माध्यमातून या विषमतेच्या वादाला दिले जाणारे उत्तर आता बॉम्बस्फोट आणि दहशतवादी कारवायांतून दिली जाऊ लागले तर गांधीजींच्या अहिंसेची शिकवण संपूर्ण जगाला देणा-या भारतातच हिंसेचे तांडव माजण्यास वेळ लागणार नाही. दहशतवाद मग तो कोणताही जात आणि धर्माचा असो तो उखडून फेकलाच पाहिजे. यात अजिबात दुमत नाही मात्र शासनाचे त्याबद्दलचे मिळमिळीत धोरण या गोष्टींना कारणीभूत ठरत आहे. दहशतवाद्यांविरुद्ध आता तरी निर्णायक लढा देण्याची गरज आहे. अन्यथा जगातील सर्वांत मोठी लोकशाही असलेल्या या देशाची एकता आणि अखंडता खिळखिळी होण्यास वेळ लागणार नाही.