मॅंगो चीजकेक ...खास प्रेमदिनानिम्मीत्त

आज प्रेमदिन आणी एकही पाकृ नाही???? असे आत्ताच आपल्या एका मिपाकर मैत्रीणीने विचारले...असं कसं होईल...आजचा दिवस खास आहे म्हणून खास पाकृ देत आहे :) तुम्ही नक्की करुन पहा आणी आपल्या प्रियजनांना खाऊ घाला :)

अतिशय सोप्पी आणी नो बेक... नो एग अशी पा़कृ आहे ;)

साहित्यः
२०० ग्राम क्रीम चीज
१५० मिली फ्रेश क्रीम
२५० ग्राम कॅन्ड मॅंगो पल्प (आंब्याच्या सीझनमध्ये ताजा आमरस वापरलात तर उत्तम)
१-१/२ वाटी मारी किंवा कुठल्याही डायजेस्टीव्ह बिस्किटांचा चुरा
२-३ टेस्पून बटर
१/२-३/४ वाटी साखर (रसाच्या गोडीप्रमाणे कमी-जास्त)
१ टेस्पून जिलेटीन पावडर
दीड टीस्पून वेलचीपूड

पाकृ:

प्रथम मारी बिस्किटांच्या चुर्‍यात वितळलेले बटर घालून नीट एकजीव करावे.

तुमच्याकडे जर का स्प्रींगफोर्मचा केक टीन असेल तर त्यात ह्या बटर घातलेल्या चुर्‍याचा बेस दाबून तयार करावा. नसेल तर कुठल्याही बाऊल/ वाईन ग्लासमध्ये चमच्या च्या मदतीने बेस दाबून तयार करावा. तयार ग्लासेस / टीन फ्रिजमध्ये १५ मिनिटे सेट होण्यासाठी ठेवावे.

आता मिक्सींग बाऊलमध्ये क्रीमचीज, फ्रेश क्रीम व साखर घालून बीटरने फेटून घ्यावे.

३ टेस्पून पाणी मायक्रोव्हेवमध्ये १०-१५ सेकंद गरम करून घ्यावे व त्यात १टेस्पून जिलेटीन पावडर घालून ती पूर्ण विरघळू द्यावी. हे मिश्रण आंब्याच्या रसात घालून एकजीव करावे. (घाई गडबडीत ह्याचे फोटो काढायचे राहून गेले :( )

आता अर्ध्यापेक्षा जास्त जिलेटीनमिश्रीत आंब्याचा रस त्यात घालावा. वेलचीपूड घालून परत एकदा बीटरने बीट करुन घ्यावे.

फ्रिजमध्ये ठेवलेले ग्लासेस/ टीन काढून त्यावर ह्या चीजच्या मिश्राणाचा जाडसर थर पसरावा.पुन्हा फ्रिजमध्ये १५ मिनिटे सेट होण्यासाठी ठेवावे.

१५ मिनिटांनी त्यावर उरलेल्या आंब्याच्या रसाचा थर द्यावा व रात्रभर फ्रिजमध्ये किंवा ६-७ तास सेट होण्यासाठी ठेवावे.

दुसर्‍या दिवशी स्प्रींगफोर्म केकटीनच्या कडेने हलकेच सुरी फिरवून त्याचे रिंगण काढावे. आवडत असल्यास त्यावर चॉकलेट सॉस / मिश्र फळ्यांच्या/ आंब्याचा तुकड्यांनी किंवा असेच पुदिनाची पाने लावून सर्व्ह करावे.

ग्लासमध्ये सर्व्ह करत असाल तर असेच सर्व्ह करा दिसायला ही छान दिसतं :)

मिपावर येऊन एक वर्ष कधी पूर्ण झाले समजले नाही... आज ही पाकृ तुम्हा सगळ्या मिपाकर मित्र-मैत्रीणींसाठी आहे :) असेच प्रेम असु द्या :)