पुलंवर बेतलेल्या 'नक्षत्रांचे देणे' चे काही भाग नुकतेच युट्यूबवर पाहिले. त्यात तुझे आहे तुजपाशी मधील 'काकाजींची' भूमिका सर्वप्रथम ज्यांनी जीवंत केली, ते दाजी भाटवडेकर पाच सहा सेकंद दिसले. काकाजीच्या भूमिकेतील ती त्यांची शब्दफेक, हावभाव आणि मंत्रमुग्ध करणारा आवेश हे सगळं आणि विकिपिडीयावरील दाजी भाटवडेकरांबद्दलची व्यक्तीगत माहिती वाचून तर तुझे आहे तुजपाशी मधील काकाजींची भूमिका ही दाजी भाटवडेकरांसाठीच लिहिली होती काय असा प्रश्न पडावा; कारण हा माणूस मूळचाच राजेशाही होता. तुझे आहे तुझपाशीच्या उपलब्ध चित्रफितीतील रवि पटवर्धन यांचा काकाजी भाटवडेकरांच्या काकाजीसमोर थोडं काहीतरी कमी असल्यासारखा वाटतो. मला तर रवि पटवर्धनांचा हा काकाजी पाहून उगीच राग आला होता. नुसत्या ऐकायला लंब्याचवड्या, आयुष्याचं सार सामावलेल्या गगनभेदी गप्पा मारणारा हा रवि पटवर्धनांचा काकाजी अभिनयाच्या बाबतीत मात्र पार फाटका वाटला. मग अशा उफराट्या काकाजीवर चीड येणार नाही तर काय होईल. काकाजींची भूमिका लार्जर दॅन दि लाईफ वठवणार्‍या दाजी भाटवडेकरांचा जालावर मात्र एक धड फोटोसुद्धा उपलब्ध नाही - त्यांनी केलेले काकाजी उपलब्ध असणे दूरची गोष्‍ट! तर भाटवडेकर काकाजी असलेल्या 'तुझे आहे तुजपाशी' कुठे मिळू शकते? हे कृपया जाणकारांनी सांगावे. जालावर काही नाही हे पक्कं, शंभरेक वेब पेजेस पालथी घातलीत. पं. वसंतराव देशपांडे आणि दाजी भाटवडेकरांच्या भूमिका असलेले 'कट्यार काळजात घुसली' हेही असेच एक नाटक. ते ही कुठे उपलब्ध असेल तर कृपया सांगावे. दाजी भाटवडेकरांच्या काकाजींची झलक 9.14 मिनिटांपासून पुढे: या निमित्ताने मिपाकरांना आवडलेल्या अशाच कितीतरी लार्जर दॅन दी लाईफ, पण नंतरच्या नटांमुळे बारगळलेल्या भूमिकांची आठवण झाल्यास हा काथ्‍याकूट सत्कारणी लागेल.