आपल्या सर्वांच्या शुभेच्छांबद्दल आभारी आहे. बाकी एकूणच समाजात MBA आणि त्यातूनही IIM च्या MBA विषयी काही मते असतात. हा कोण अमका?तो IIM चा ना मग तो तसलाच असणार! आता तसलाच म्हणजे कसा?तर स्वत:ला अतिशहाणा समजणारा आणि आपण स्वत: कोणत्या परिस्थितीतून आलो हे विसरून आपल्याच लोकांना तुच्छतेने वागवणारा! मंडळी, एक गोष्ट नक्की सांगतो की मी ’तसला’ नक्कीच बनणार नाही.आणि ’तसल्या’ लोकांमध्ये IIM मध्ये गेलेले आणि न गेलेले असे सगळेच लोक असतात. तसेच दुसरे सांगायचे म्हणजे मी एक चारचौघांसारख्या आशाआकांक्षा असणारा सामान्य माणूस आहे.मला पैशाचे महत्व नाही असे म्हणत संतपणाची झूल मी अजिबात पांघरलेली नाही.चांगल्या मार्गाने आणि इतरांना न फसवता मिळालेला पैसा मला नक्कीच हवा आहे आणि हे सांगताना मला कसलाही कमीपणा वाटत नाही. (स्वगत: पैशाची कहाणी उगीच का लिहिली?) बाकी जेव्हा वेळ मिळेल तेव्हा मिपावर वेगवेगळ्या विषयांवर माहिती करून देणारे लेख लिहायला मला आवडेलच.आणि हो ते आपल्या अस्सल मराठमोळ्या मायबोलीत साध्या शब्दात. बाकी विडंबन, कविता, ललित साहित्य अशा विषयांमध्ये मला शून्य गती असल्याने त्यावर लिहिता येणार नाहीच पण माझ्या आवडीच्या विषयांवर लिहायला जरूर आवडेल. ध.मु, कॅट तर द्यावीच लागली.ती नसती दिली तर IIM ने उभे पण केले नसते.त्यामुळे ती परीक्षा द्यावीच लागली.काय करणार? अवांतर-- IIM अहमदाबादने २४ फेब्रुवारी रोजी बंगलोरला मला निबंध लेखन आणि मुलाखतीसाठी बोलावले होते.२१ तारखेला मला मुंबईत अपघात झाला आणि डावा पाय गुडघ्याजवळ फ्रॅक्चर झाला.त्यावेळी उभे राहणेही अजिबात शक्य नव्हते आणि मी व्हिल-चेअरवरून निबंध लिहिला आणि मुलाखत दिली.तसेच पुण्याला परत आल्यानंतर छोटी शस्त्रक्रिया झाली.या सगळ्या गडबडीत तिकडे जायला मिळाले हीच मोठी गोष्ट होती.त्यामुळे हा सगळा अनुभव न विसरण्यासारखा आहे. ('तसला' न बनू इच्छिणारा) विल्यम जेफरसन क्लिंटन

नमस्कार मंडळी, परवापासून अभिनंदनाचे एकावर एक फोन येत होते आणि अनेक भेटायला आले. त्या गडबडीत मिपावर मधून मधून ५-१० मिनिटे यायला मिळाले.मी आपल्या सगळ्यांच्या शुभेच्छांचे संदेश वाचले आणि त्याबद्दल मी आपला आभारी आहेच.कोणाही माणसाला मोठं व्हायला स्वत:च्या प्रयत्नांबरोबरच इतरांच्या शुभेच्छांचीही गरज असते.आणि मिपाकरांच्या शुभेच्छा माझ्याबरोबर आहेत याची पूर्ण खात्री आहे.त्याबद्दल आपले आभार मानावेत तेवढे थोडे. माझा अभ्यासक्रम पूर्ण झाल्यावर सगळे काही मार्गी लागले की मिपासारख्या व्यासपीठांवरील किंवा इतर कोणालाही माझ्या विषयाशी संबंधित कसलेही मार्गदर्शन लागले तर ते मी नक्कीच देईन याची खात्री बाळगा.त्यासाठी लागणारा अनुभव आणि ज्ञान मला माझ्या अभ्यासक्रमात मिळेल अशी अपेक्षा आहे.एकूणच एकमेकांना सहकार्य आणि मदत करून आपण सगळेच पुढे जाऊ शकू. आपल्या सर्वांच्या शुभेच्छांबद्द्ल पुन्हा एकदा आभार. ---विल्यम जेफरसन क्लिंटन