Skip to main content

श्रीगणेश लेखमाला २०२१ - क्रिस्पी खाजे / चिरोटे

लेखक पियुशा यांनी मंगळवार, 14/09/2021 09:23 या दिवशी प्रकाशित केले.
श्रीगणेश लेखमाला २०२१

क्रिस्पी खाजे / चिरोटे

नाजूक तोंडांत विरघळणारे खाजे किंवा चिरोटे न आवडणारे प्राणी विरळाच !
खाण्यास जितके अप्रतिम, तितकेच बनवायला कठीण असतील, असं बऱ्याच लोकांना वाटतं पण तसं अजिबात नाहीये. हाताशी थोडा निवांत वेळ ,सोबतीला आवडतं संगीत असेल तर हा पदार्थ कधी तयार झाला, तुम्हाला देखील कळणार नाही!

चला मग करुया सुरवात..

कृती:
एका परातीत २ वाट्या मैदा घ्यायचा.
मधोमध गोल करायचा. त्यात घालायचं चिमूट भर मीठ, आणि सोबतीला घालायचं ५-६ चमचे खाण्याचे तेल (चमचे आपले कांदेपोह्यांचे).
आता हे तेल सर्व मैद्याला हाताने चोळून घ्यायचं, पिठाची मूठ तयार झाली पाहिजे. मूठ नसेल होत तर एकदोन चमचे तेल अजुन घाला. मूठ तयार म्हणजे परफेक्ट मोहन!
आता थोडं थोडं पाणी घालून पोळ्यांसाठी जशी कणीक मळतो तशीच मऊ मळून घेणे.
आता तयार गोळा २० ते २५ मिनिटांसाठी रेस्ट करायला झाकून ठेवा.

तोपर्यंत पाक बनवून घेऊ. पाक पण सोप्पाच आहे.
ज्या वाटीने मैदा घेतलाय तीच वाटी गच्च भरून साखर घ्या. ती एका जाड बुडाच्या कढईत किंवा पातेल्यात ओता. त्यात तीच वाटी भरून पाणी घाला. गॅस चालू करून पहिली उकळी आली की त्यात लिंबाची चतकोर फोड पिळून घेणे. २-३ हिरव्या वेलची आणि खायचा केशरी कलर अगदी चिमुट भर( ऑप्शनल) टाका.
तीन ते चार मिनिटांनी पाक बोटाच्या चिमटीत घेऊन चेक करा. मधासारखा घट्ट आणि चिकट लागला की लगेच गॅस बंद! एकतारी, दोनतारी पाकची कटकट नाही बघा!

आता पिठानी भरपूर आराम केलाय. त्याला जरा व्यवस्थित मळून तेलाचा हात लावून समान असे ५ गोळे किंवा उंडे तयार करून घ्या.

1



आता आपण २ मिनिटात याला लावायचा साटा तयार करून घेऊ.
२ चमचे भरून तूप(वितळले ले नाही) आणि २ चमचे मैदा एका मोठ्या वाटीत घेऊन फेटायचं. इतकं फेटायचं की ते हलकं आणि शुभ्र झालं पाहिजे मलई सारखं. झाला आपला साटा तयार!

आता एक लाटलेली पोळी घेऊन त्यावर हातानेच नीट साटा पसरवून घ्यायचा.


2



अशा प्रकारे साटा लावून त्यावर दूसरी पोळी ठेवायची. पुन्हा साटा लावायचा. मग परत सेम कृती.
सर्व पोळ्यांना साटा लावुन झाला की मग त्याची गुंडाळी(रोल) करायची.


3



मग त्याच्या समान लाट्या कापून घ्यायच्या.


4



आता एक-एक लाटी घेऊन तिला बोटांनी हलकेच दाब द्यावा.


5



आणी एकदाच त्यावर अगदी अलगद लाटणं फिरवावं, म्हणजे लेअर्स दाबले जात नाहीत.


6



आता तेल तापत ठेवायचं. अगदी कडकडीत नको साधारण तेल गरम झाले की गॅस कमी करायचा.
तेलात छोटी गोळी टाकायची. ती गोळी वर आली की चिरोटे/ खाजे सोडायचे. तेलात मंद आचेवर छान तळून घ्यायचे.

एकेक पदर मस्त सुटतात -


7



8



सर्व खाजे तळून झाले, पण तोपर्यंत आपला पाक गार झाला असेल. तर तो थोडा गरम करून घ्या आणि हे गरम गरम खाजे त्यात साधारण अर्धा मिनिट ( एका बाजूने १५-२० सेकंद) मुरत ठेवा.


9



10



बघता बघता झाले की राव! क्रिस्पी खाजे म्हणा किंवा चिरोटे म्हणा..
आता लाळ गाळत बसू नका, रेसिपी लगेच करायला घ्या!


11



12



13

-पियुषा.

विशेष
श्रीगणेश लेखमाला २०२१
वाचने 28203
प्रतिक्रिया 26

प्रतिक्रिया

स्मिताके मंगळवार, 14/09/2021 17:18

पियुशा दोन्ही पाककृती मस्त. फोटोही किती सुंदर. (कधीतरी) प्रयत्न करण्याच्या यादीत दोन्ही घातल्या आहेत :) :)

सुधीर कांदळकर बुधवार, 15/09/2021 07:22

मूठ तयार म्हणजे परफेक्ट मोहन!


मधासारखा घट्ट आणि चिकट लागला की लगेच गॅस बंद! एकतारी, दोनतारी पाकची कटकट नाही बघा!


आणी एकदाच त्यावर अगदी अलगद लाटणं फिरवावं, म्हणजे लेअर्स दाबले जात नाहीत.

अशा मस्त सूचना. सोबतीला मस्त प्रकाशचित्रे. आवडले. धन्यवाद.

कपिलमुनी बुधवार, 15/09/2021 08:12

रेसिपी उत्तम आणि तोंपासू !

गोड न खाण्याच्या बंधनामुळे हे तिखट बनवता येतील का ?

पियुशा बुधवार, 15/09/2021 14:44

तिखट तर अजुन सोप्प काम , पाक बनवायला नको, मैदा मळताणाच त्यात चवीनुसार मीठ , लाल तिखट add करा हव तर थोडे जिरे , ओवा, कसुरी मेथी घालावी, मस्त चहा बरोबर कुरकुरीत लेर्स वाली खारी म्हणून सहज खपून जाईल

अनिंद्य गुरुवार, 16/09/2021 11:47

ही तर भारी आयडियाची कल्पना, करून बघणेत येईल :-)

(मूळ कृती पण छानच आहे, फक्त सध्या गोडावर बंदीहुकूम लागू केलाय मला)

सरिता बांदेकर बुधवार, 15/09/2021 14:13

छान. रेसीपी वाचल्यावर वाटतंय आपल्याला पण जमेल करायला.खूप महत्वाच्या टीप्स दिल्या आहेत.
धन्यवाद.

तुषार काळभोर बुधवार, 15/09/2021 21:15

इतक्या सोप्या पद्धतीने सांगितलंय की 'ह्या! त्यात काय एवढं!' असं वाटेल एखाद्याला.

कपिलमुनी बुधवार, 15/09/2021 23:06

तळणे टाळून एयर फ्रायरमध्ये होतील का हो हे?

कॅलरीमुनी

चौकस२१२ गुरुवार, 16/09/2021 05:04

एयर फ्रायरमध्ये
" त्यात जे साटे म्हणजे तूप आहे त्यामुळे थोडा खुशखुशीत पणा येईल बहुतेक " तुका म्हणे त्यातल्या त्यात " अप्लाय येथे जर ग्रीक फिलो पेस्ट्री ( भारतातातील पेस्ट्री नव्हे ) तर अनेक पापुद्रे असलेली मैद्याची पोळी सारखी मिळत असेल तर ... आधी करून बघा म्हणजे मी काय म्हणतो त्याची कल्पना येईल

पियुशा गुरुवार, 16/09/2021 05:55

काही कल्पना नाही कारण मी कधी ट्राय केले नाही एअर फ्रायर मध्ये,चौकस म्हणताहेत तसे प्रयोग(थोड्या प्रमाणात) करून बघायला हरकत नाही

आग्या१९९० बुधवार, 15/09/2021 23:44

मूठ तयार म्हणजे परफेक्ट मोहन!
एक शंका. तेल गरम करून पिठात टाकले जाते त्याला मोहन म्हणतात. पाकृ मध्ये पिठात गरम तेल टाकायचे का?

पियुशा गुरुवार, 16/09/2021 00:34

नाही तेल गरम वैगरे नाही करायचं ,गारच वापरायचं आहे

प्रा.डॉ.दिलीप बिरुटे गुरुवार, 16/09/2021 08:39

वाह ! नंबर एक दिसत आहेते. आपल्याला आवडतात चिरोटे.
कुरीयरने पाठवून देणे. धन्यवाद. :)

-दिलीप बिरुटे

ज्ञानोबाचे पैजार शुक्रवार, 17/09/2021 08:27

या चिरोट्यां करता मी कुरीयर बॉय व्हायला तयार आहे.
चिरोट्यांचा डबा विनामुल्य बिरुटेसरांपर्यंत पोचवण्याचे काम मी आनंदाने करेन.
पैजारबुवा,