खुसखुशित पाकातल्या पुर्‍या कृती : एक वाटी मैदा आणि अर्धीवाटी बारीक रवा घ्यावा. दोन्ही छान एकत्र करून त्यात मधोमध गोल करून चिमूट भर मीठ आणि तीन चमचे गरम तुपाचे मोहन घ्यावे. मोहन पिठात व्यवस्थित मिक्स करून घ्यावे . आता पीठ मळण्याकरिता ताज्या दह्याचा वापर करावा . जास्त घट्ट किंवा जास्त पातळ पीठ न मळता मध्यम consistency च पीठ भिजवून घ्यावे आणि साधारण अर्धा तास झाकून ठेवावे. तोपर्यंत आपण पाक करून घ्यायचा , पाका साठी एका कढईत एक वाटी साखर घेऊन त्यात एक वाटी पाणी घावे आणि गॅस वर उकळत ठेवावे ( भांड जाड बुडाच असेल तर उत्तम) त्यात दोन - तीन हिरव्या वेलच्या घालव्या, चिमुटभर केशर(ऑप्शनल) घालावे आपल्याला एक तारी किंवा दोन तारी पाक करायचा नाही फक्त पाक हा मधा सारखा चिकट लागला पाहिजे बोटांना. साधारण एक उकळी आली की दोन ते तीन मिनिटांनी बोटाच्या चिमटीत थोड मिश्रण घेऊन चेक करायचं पाक बोटांना चिकट वाटला की गॅस बंद करायचा. आता पुर्‍यांचे पीठ छान भिजलेलं आहे ते पुन्हा एकदा मळून घ्यायचं आणि थोडासा मैदा लावून चपाती लाटून घ्यावी आणि वाटी किंवा ग्लास च्यां मदतीने एकसारख्या पुऱ्या कापून घ्याव्यात. कढईत तेल तापवून घ्यावे आणि पुऱ्या छान तळून घ्याव्यात मस्त ट्टम फुगतात ह्या पुऱ्या, आता कोमट पाकात गरम पुऱ्या आलटून पालटून बुडवून घ्याव्यात (१५-२० सेकंद) ह्या झाल्या आपल्या पाकातल्या खुसखुशीत पुऱ्या. टिप्स: १) दही शक्यतो ताज घ्यावं खूप आंबट असेल तर टेस्ट बिघडू शकते २) पुरी गरम असतानाच पाक सुधा थोडा गरम असावा तरच पाक छान मुरला जातो.

-पियुषा.