वैशाखाची ऊन्हं जेव्हा नको नको झाली,
वळीवाची आठवण उमलून आली.
बहाव्याने केली रिती फुलांची पखाल,
पंगा-याच्या अंगावर खुळावली लाली..
सावरीच्या म्हातारीला पंख पंख फुटे,
वयासंगे उडुनिया गेले तिचे काटे.
चाफ्याचा बहर जणू बैराग्याची झोळी,
धरू धरू म्हणताना काहीतरी सुटे.
सुकलेले पात्र, मधे खोल खोल डोह,
सुटता सुटेना कसा जीवनाचा मोह.
काठावर कुणी वेडा सूर तोलणारा,
कंठी त्याच्या मल्हाराचा ओला अवरोह.
ऐकुनिया बकुळी ती लाजली जराशी,
चित्त तिचे उडुनिया गेले कुणापाशी?
नादावले मन तिचे उतू उतू जाई
पायापाशी म्हणूनच नव्हाळीची राशी.
वैशाखाची उन्हं मग गंधमय झाली
वळीवाची आठवण दूरदूर गेली...
प्रतिक्रिया
29 Apr 2022 - 6:25 pm | चांदणे संदीप
खूपच आवडली रचना. वाखूसा.
(पंगारा = पांगरा?)
सं - दी - प
29 Apr 2022 - 6:30 pm | प्राची अश्विनी
धन्यवाद.
हो तोच लाल फुलं असणारा.
29 Apr 2022 - 7:00 pm | Bhakti
सुंदर! पुन्हा पुन्हा वाचावी अशी!
29 Apr 2022 - 9:18 pm | अनन्त्_यात्री
गारव्याचा शिडकावा!
29 Apr 2022 - 9:52 pm | प्रा.डॉ.दिलीप बिरुटे
आवडली रचना. लिहिते राहा.
-दिलीप बिरुटे
29 Apr 2022 - 10:42 pm | माहितगार
चित्रात तरंगावे तल्लीन काव्य बिंदू
तैसी कवियत्री प्राची अश्विनींच्या
अभिजात काव्याची प्रचिती खास
30 Apr 2022 - 12:00 am | पाषाणभेद
वैशाखाचे उन्ह देखील सुखावणारे आहे हे समजावून देणारी कवीता!
30 Apr 2022 - 1:37 pm | ज्ञानोबाचे पैजार
नितांतसुंदर आणि चित्रदर्शी, फार आवडली कविता....
होरपळून टाकणर्या वैशाख वणव्यामधे अचानक वळीव आल्यावर जो अनुभव येतो तोच अनुभव ही कविता वाचताना आला.
उन्हाळ्यावरची सुखद कविता बर्याच दिवसांनी वाचायला मिळाली.
मिपावरच्या सर्वोत्तम कवितांची यादी बनवायची झाली तर त्या यादित ही कविता नक्की आली पाहिजे.
पैजारबुवा,
30 Apr 2022 - 5:41 pm | सस्नेह
सुरेल शब्दांचे रसमय कारंजे . थंडगार तुषार अंगावर शिडकावा करणारे !
30 Apr 2022 - 9:53 pm | कर्नलतपस्वी
वैशाखातली उन्हं
कैरीची पन्हं
याच नातं लई जुनं
बेलाच फळ
वैशाखातली झळ
लई जुना मेंळ
कवीता आवडली.
1 May 2022 - 10:22 am | प्राची अश्विनी
पन्ह -हायलं खरं. बेलफळ कधी खाल्लं नाहीये.
1 May 2022 - 12:19 pm | कर्नलतपस्वी
उत्तर भारतात उन्हाळ्यात उन बाधू नये म्हणून पिकलेल्या बेलफळाचे सरबत पितात.जागोजागी सरबताच्या हातगाड्या उभ्या दिसतात.
1 May 2022 - 8:40 am | सुरसंगम
अति सुंदर!
1 May 2022 - 9:29 am | कुमार१
आणि समयोचित ....
पु ले शु
1 May 2022 - 11:06 am | प्राची अश्विनी
धन्यवाद सगळ्यांना.
13 May 2022 - 9:41 pm | श्रीगणेशा
खूप छान!
कवयित्रीने केली रिती शब्दांची पखाल!!
16 May 2022 - 5:44 am | प्राची अश्विनी
धन्यवाद श्रीगणेशा!